2013 წლის ჰიტის Blurred Lines-ის შემსრულებელი ამერიკელი მუსიკოსები რობინ ტიკი და ფარელ უილიამსი სოულ მომღერლის მარვინ გეის საავტორო უფლებების დარღვევაში დამნაშავედ ცნეს. ახლა ისინი იძულებული არიან გარდაცვლილი მუსიკოსის ოჯახს 5 მილიონი დოლარი გადაუხადონ – ასე დასრულდა საავტორო უფლებების დარღვევის შესახებ ერთ-ერთი ყველაზე ხმაურიანი პროცესი, რომელსაც არა მხოლოდ მუსიკალური ინდუსტრია ადევნებდა თვალყურს – “ბიბისი” წერს.
კალიფორნიის სასამართლოს გადაწყვეტილებით, ტიკი, უილიამსი და კომპანია More Water From Nazareth გეის ოჯახს 2,8 მილიონ დოლარს გადაუხდიან, გარდა ამისა, რობინ ტიკმა ცალკე 1,76 მილიონი დოლარი უნდა გადაიხადოს, უილიამსმა – 357 ათასი დოლარი. მარვინ გეის ოჯახს, ასევე, კომპოზიციის რეალიზაციიდან მიღებული თანხის ნახევარი გადაეცემა – სულ ოჯახი სიმღერა Blurred Lines-ის მოგების მესამედს მიიღებს. სიმღერის ირგვლივ სასამართლო პროცესი 2013 წლიდან მიდის.
მარვინ გეის სიმღერა Got To Give It Up 1977 წლის ჰიტი იყო.
