თბილისის ყოვლადწმინდა სამების სახელობის საპატრიარქო ტაძარში, სულთმოფენობის დღესასწაულზე, რომელიც ამავდროულად ტაძრის დღესასწაულიცაა, მცხეთა-თბილისის მთავარეპისკოპოსმა და ბიჭვინთისა და ცხუმ-აფხაზეთის მიტროპოლიტმა შიომ ქადაგება წარმოთქვა.
პატრიარქმა ხაზი გაუსვა სულთმოფენობის ისტორიულ მნიშვნელობას და აღნიშნა, რომ ეს არის ქრისტეს ეკლესიის დაარსებისა და „დაბადების“ დღე, როდესაც ცეცხლოვანი ენების სახით მოციქულებზე სულიწმინდის გარდამოსვლამ ისინი ქრისტეს სახარების უშიშარ მქადაგებლებად აქცია.
ქადაგებისას სრულიად საქართველოს კათოლიკოს -პატრიარქმა შიო მესამემ ყურადღება გაამახვილა ქრისტიანული ცხოვრების მთავარ მიზანზე — სულიწმინდის მადლის მოხვეჭაზე.
„მრავალი წმინდა მამა წერს, რომ მთავარი მიზანი ქრისტიანული ცხოვრებისა სწორედ სულიწმინდის მადლის მოხვეჭაა. ამიტომ ყოველთვის უნდა ვევედროთ უფალს, მოგვცეს სულიწმინდის მადლი. თავად უფალმა იესო ქრისტემ გვითხრა, რომ მამა ზეციერი მოგვცემს სულიწმინდას ყველას, ვინც მას სთხოვს“, — აღნიშნა შიო მესამემ.
თავის ქადაგებაში შიო მესამემ გაიხსენა უწმინდესი და უნეტარესი, სრულიად საქართველოს კათოლიკოს-პატრიარქი ილია II. მან ყურადღება გაამახვილა პატრიარქის ღვაწლზე და აღნიშნა, რომ სამების ტაძარი, რომელსაც პატრიარქი „საქართველოს ავტოპორტრეტს“ უწოდებდა, მისი სამოციქულო მასშტაბის ღვაწლის სიმბოლოა.
ქადაგების ბოლოს მიტროპოლიტმა შიომ მრევლს სულიწმინდის მადლის სინათლის შენარჩუნება უსურვა, რათა, მისი თქმით, თითოეული მორწმუნე გახდეს ტაძარი ღვთისა, სადაც სულიწმინდა დაემკვიდრება.
„შეგვეწიოს უფალი, რომ მოვიხვეჭოთ მადლი სულისა წმინდისა, შევინარჩუნოთ სულიწმინდის მადლის სინათლე, გავხდეთ ტაძარი ღვთისა და სული ღვთისა მკვიდრობდეს ჩვენში“, — განაცხადა მეუფე შიომ.
