„რაინეართან“ შეთანხმებულები ვართ 12 ახალ მიმართულებაზე, მათ შორის არის ევროპის სხვადასხვა მიმზიდველი და საინტერესო ქალაქი

region
ავტ.: region აგვისტო 21, 2019 15:53

„რაინეართან“ შეთანხმებულები ვართ 12 ახალ მიმართულებაზე, მათ შორის არის ევროპის სხვადასხვა მიმზიდველი და საინტერესო ქალაქი

მსოფლიოს ერთ-ერთი უმსხვილესი და ცნობილი ირლანდიური დაბალბიუჯეტური ავიაკომპანია „რაინეარი“ საქართველოს ბაზარზე ოპერირებას იწყებს, – ამის შესახებ ეკონომიკისა და და მდგრადი განვითარების მინისტრმა ნათია თურნავამ განაცხადა.

ნათია თურნავას განცხადებით, პირდაპირი ავიარეისები ევროპის მიმართულებით, როგორც ქუთაისის, ისე თბილისის საერთაშორისო აეროპორტიდან შესრულდება.

„წარმატებით დავასრულეთ საკმაოდ ინტენსიური და რთული მოლაპარაკებები – იწყება პირდაპირი ფრენები ახალი მიმართულებებით როგორც ქუთაისის, ასევე თბილისის საერთაშორისო აეროპორტიდან. შეთანხმებულები ვართ 12 ახალ მიმართულებაზე, მათ შორის არის ევროპის სხვადასხვა მიმზიდველი და საინტერესო ქალაქები, საიდანაც ველოდებით ახალი ტურისტული ნაკადების შემოსვლას“, – განაცხადა ეკონომიკისა და მდგრადი განვითარების მინისტრმა.

კომპანიასთან ურთიერთთანამშრომლობის შესახებ ხელშეკრულება დღეს საქართველოს მთავრობის ადმინისტრაციაში გაფორმდა. ხელშეკრულებას ხელი ეკონომიკისა და მდგრადი განვითარების სამინისტროს ,,საქართველოს აეროპორტების გაერთიანების“ დირექტორმა, გიორგი ჩოგოვაძემ და „რაინეარის“ კომერციულმა დირექტორმა დევიდ ო’ ბრაიენმა მოაწერეს.

პირველ ეტაპზე „რაინეარი“ ქუთაისის დავით აღმაშენებლის სახელობის აეროპორტიდან მარსელისა და ბოლონიის მიმართულებით კვირაში ორ-ორი სიხშირით შეასრულებს რეისებს, ხოლო თბილისის შოთა რუსთაველის სახელობის აეროპორტიდან კვირაში ოთხი სიხშირით მილანში იფრენს. პირდაპირი ავიარეისები ევროპის მიმართულებით 2019 წლის 6 ნოემბრიდან დაიწყება.

ირლანდიური დაბალბიუჯეტური ავიაკომპანია „რაინეარი“ 1984 წელს დაფუძნდა. კომპანიის ავიაპარკი 455 ერთეული ბოინგ 737-800 ტიპის საჰაერო ხომალდისგან შედგება, რომელთა მოცულობა 189 მგზავრს შეადგენს. ამ დროისთვის ავიაკომპანია ევროპის, ჩრდილოეთ აფრიკის (მოროკო) და შუა აღმოსავლეთის (ისრაელი, ლიბანი და იორდანია) 38 ქვეყნის 1800 მიმართულებით 224 აეროპორტში ოპერირებს.

2018 წლის მონაცემებით, ავიაკომპანიამ ჯამურად 139 მილიონი მგზავრი გადაიყვანა და ევროპის ბაზარზე სიდიდით მეორე ავიაკომპანია გახდა.

region
ავტ.: region აგვისტო 21, 2019 15:53

გამოკითხვა

ამჟამად არცერთი გამოკითხვა არ მიმდინარეობს.

Google სტატისტიკა


6,774
ვიზიტორი
დღეში
Powered By Google Analytics