რა შესთავაზა ოლიგარქმა ივანიშვილმა მამუკა ხაზარაძეს არჩევნების შემდეგ – “ძლიერი საქართველოს“ ლიდერის სკანდალური განცხადება

პარტია “ლელოს” ლიდერის, მამუკა ხაზარაძის განცხადებით, “ქართული ოცნების” საპატიო თავმჯდომარეს, ბიძინა ივანიშვილს, მათთან კონტაქტის მცდელობა ჰქონდა, თუმცა პასუხად მიიღო, რომ “გარიგება არ იქნება”. ამის შესახებ ოპოზიციონერმა პოლიტიკოსმა “ტვ პირველის” ეთერში საუბრისას განაცხადა.

“ორჯერ ჰქონდა [ბიძინა] ივანიშვილს ჩვენთან კონტაქტის მცდელობა. პასუხად მიიღო ის, რომ არანაირი გარიგება მასთან და იმ ადამიანებთან, ვინც ქვეყანას მიათრევს ჭაობში, არ იქნება. ჩვენ ვართ გზის გასაყარზე – აქეთ არის რუსეთი და წარსული, იქეთ არის მომავალი. მას ხომ ღირებულებები აღრეული აქვს და ჰგონია, რომ ყველგან დაალაგებს. იგი ამ ქვეყანას უყურებს, როგორც რაღაც კომპანიას. მას ჰგონია, რომ ყველა ადამიანს აქვს ინტერესი. ეს კაცი არის საშიში თავისი მენტალობით”, – განაცხადა ხაზარაძემ.

წამყვანის კითხვაზე, როდის შედგა კონტაქტი და რა ფორმით დაუკავშირდა იგი მათ, ხაზარაძე ამბობს, რომ ივანიშვილმა მას არჩევნების შემდეგ “კაცი გაუგზავნა”, რადგან არ ელოდა, რომ არჩევნებს ოპოზიცია და პრეზიდენტი არალეგიტიმურად გამოაცხადებდნენ.

“არჩევნების შემდეგ გამოგვიგზავნა კაცი, რადგან არ მოელოდა, რომ ჩვენ ამ არჩევნებს არალეგიტიმურად გამოვაცხადებდით. ეს იყო მისთვის პირველი შოკი. მას ეგონა, რომ ამ არჩევნებსაც გადააბალახებდა, ისე როგორც გადააბალახა შარლ მიშელის დოკუმენტი”, – თქვა მან და დაამატა, რომ საუბარი არ ყოფილა პარლამენტში შესვლაზე, “კონკრეტიკა არ იყო”, არამედ ეს იყო “მოსინჯვა”.

“ის ცდილობს და მისი მეთოდია, რომ ვინმეს რამე შესთავაზოს, იყიდოს”.

banner
წინა სტატიაშიმამუკა ხაზარაძე: გასაგებად უნდა მივამართო “ოცნების“ ჯერ კიდევ შემორჩენილ ამომრჩეველს, მეგობრებო, სრულ იზოლაციაში მიჰყავს ივანიშვილს ეს ქვეყანა და ვერ გავატანთ
შემდეგი სტატიახვიჩა კვარაცხელია „ნაპოლის“ დაემშვიდობა [ვიდეო]