ყოფილი პარლამენტარი ნიკა მელია საპატიმროდან გავრცელებულ წერილში მიხეილ სააკაშვილს „ვივამედში“ ყოფნის პერიოდში ხელისუფლებასთან ფარულ გარიგებაში ადანაშაულებს. მელიას თქმით, სააკაშვილი 2022 წლის განმავლობაში აქტიურად ეკონტაქტებოდა ერთ-ერთ პერსონას, რომელიც მმართველი გუნდის წარმომადგენლებთან მის „მოციქულად“ მუშაობდა.
„ამ კაცის მეშვეობით რა გარიგება დაიდო ხელისუფლებასთან და 2022 წლის ბოლოს რაში გადააგდეს სააკაშვილი?! ამ ძალიან მძიმე დეტალებს ფართო საზოგადოება მაინც შეიტყობს, თანაც კონკრეტული ფაქტებით და აჯობებს თავად დაასახელოს ის კაციც და მისი პარტნიორებიც“, — აცხადებს მელია.
მისივე შეფასებით, სააკაშვილის მხრიდან მის წინააღმდეგ ატეხილი „ტალახის სროლა“ მხოლოდ იმას ემსახურება, რომ გადაიფაროს ხელისუფლებასთან გარიგებაში შესვლის კონკრეტული ისტორია, რომელიც ექსპრეზიდენტის უცხოეთში გაშვების სანაცვლოდ იგეგმებოდა.
