“რ2”-ის დროებითი მმართველები გასაჩივრების ეტაპების გავლამდე მოვალეობის შესრულებას არ აპირებენ

რუსთავი 2-ის დროებითი მმართველები საქალაქო სასამართლოს განჩინების გასაჩივრების ყველა ეტაპის გავლამდე ტელეკომპანიაში მოვალეობის შესრულებას არ აპირებენ. რეზო საყევარიშვილი და დავით დვალი ერთობლივ განცხადებას ავრცელებენ.

“ვინაიდან, საქალაქო სასამართლოს 5 ნოემბრის განჩინება არ არის საბოლოო, ექვემდებარება გასაჩივრებას ჯერ პირველ ინსტანციაში, ხოლო შემდგომ სააპელაციო სასამართლოში და არსებობს სამართლებრივი შესაძლებლობა, რომ ტელევიზიის დროებით მმართველებად ჩვენი დანიშვნის გადაწყვეტილება შეიცვალოს, ჩვენ ვაპირებთ, დაველოდოთ გასაჩივრების შედეგებს და მხოლოდ მას შემდეგ, რაც სასამართლოს ეს განჩინება გაივლის გასაჩივრების ყველა ეტაპს და მიიღებს საბოლოო სახეს, მხოლოდ ამის შემდეგ მივიდეთ ტელევიზიაში და შევასრულოთ ხსენებული განჩინებით ჩვენზე დაკისრებული უფლება-მოვალეობები”, – ნათქვამია განცხადებაში.

სამაუწყებლო კომპანიის დროებითი მმართველები არხის მოქმედ პარტნიორებს – ყარამანიშვილებს მიმართავენ, წამოაყენონ ნებისმიერი კანდიდატურა რუსთავი 2-ის გენერალური და ფინანსური დირექტორების თანამდებობაზე, რომელთაც დაუყოვნებლივ მიანიჭებენ სრულ უფლებამოსილებას ტელეკომპანიის მართვის საკითხებში.

“ვინაიდან, ამ ეტაპზე, რუსთავი 2-ის გენერალურ და ფინანსურ დირექტორებს შეჩერებული აქვთ უფლებამოსილება, მზად ვართ გავიზიაროთ მოქმედი პარტნიორების, კერძოდ, ყარამანიშვილების სურვილი და მათ მიერ წარმოდგენილ ნებისმიერ კანდიდატს დაუყოვნებლივ მივანიჭოთ სრული უფლებამოსილება ტელეკომპანიის მართვის საკითხებში.
შესაბამისად, ჩვენ ველოდებით ყარამანიშვილების კანდიდატურას, რომ არ შეიქმნას ტელეკომპანიის საქმიანობაში სამართლებრივი ვაკუუმი და შესაბამისად, ტელეკომპანიას არ შეექმნას გარკვეული პრობლემები საქმიანობაში.

“ჩვენ, რუსთავი 2-ის დროებითი მმართველები ყველაზე მეტად ვართ დაინტერესებულები, რომ ტელეკომპანიამ შეუფერხებლად განაგრძოს მაუწყებლობა. ეს საქართველოს საზოგადოების უმთავრესი დაკვეთაა,” – აღნიშნულია განცხადებაში.

banner
წინა სტატიაშინინო გვენეტაძეს ურთმელიძისგან შეხვედრაზე თანხმობა, ამ დრომდე არ მიუღია
შემდეგი სტატიაგოგი თოფაძეს ადგილს პარლამენტში მისივე დის შვილი დაიკავებს