საქართველოში ქრისტიანობის სახელმწიფო რელიგიად გამოცხადების 1700 წლის იუბილე მასშტაბურად აღინიშნება. ღონისძიებების ორგანიზებისთვის მთავრობის სარეზერვო ფონდიდან საპატრიარქოს 5.3 მილიონი ლარი გადაეცემა.
განკარგულება ძალაში პრემიერ ირაკლი კობახიძის ხელმოწერის შემდეგ შევიდა. როგორც მთავრობის ოფიციალურ გვერდზე ვრცელდება, კამპანია 1 ივნისიდან დაიწყება და 14 ოქტომბრის ჩათვლით გაგრძელდება.
„დაგეგმილია როგორც კულტურულ-საგანმანათლებლო პროგრამები, ასევე სამეცნიერო კონფერენციები და სტუდენტური ექსპედიციები. ღონისძიებები სვეტიცხოვლობის დღესასწაულის ჩათვლით გაგრძელდება. 14 ოქტომბერს დაგეგმილია სიმპოზიუმი თემაზე – „ღმერთი, სამშობლო, ადამიანი“, — ნათქვამია გავრცელებულ ინფორმაციაში.
