საშემოდგომო სესიაზე საპარლამენტო უმრავლესობა ახალ კანონპროექტს წარადგენს, რომელიც სურსათის მიწოდების ჯაჭვში არაკეთილსინდისიერი სავაჭრო პრაქტიკის აკრძალვას ითვალისწინებს. საკანონმდებლო ინიციატივას პარლამენტში გარემოს დაცვისა და სოფლის მეურნეობის სამინისტრო წარადგენს.
დადგენილების ტექსტის თანახმად, მოქმედ სისტემაში სურსათის მიწოდების ჯაჭვის მონაწილეებს შორის მოლაპარაკებითი ძალაუფლების არსებითი დისბალანსი არსებობს, სადაც მსხვილი მყიდველები მიმწოდებლებს ცალმხრივ და უსამართლო პირობებს უწესებენ.
ძირითადი პრობლემები, რომელთა აღმოფხვრასაც კანონპროექტი ისახავს მიზნად:
მიმწოდებლებისთვის თანხების დაგვიანებით გადახდის პრაქტიკის შეზღუდვა;
მყიდველების მიერ შეკვეთების უკანასკნელ მომენტში გაუქმების აკრძალვა;
პროდუქციის თაროზე განთავსებისა და მარკეტინგული მომსახურების ხარჯების იძულებითი გადაკისრების აღკვეთა.
ინიციატორების განმარტებით, არსებული უთანაბრო პირობები საფრთხეს უქმნის ქვეყანაში სასურსათო ჯაჭვის მდგრადობასა და ადგილობრივი მიმწოდებლების სტაბილურობას.
