GFK-ს მიერ ჩატარებულ კვლევის შედეგებს ნაციონალურ მოძრაობაში ნდობას უცხადებენ და აცხადებენ, რომ ბოლო პერიოდში ჩატარებულ ყველა კვლევაში საზოგადოების განწყობები და პოლიტიკური რეიტინგები ერთნაირია.
ამის შესახებ გადაცემა არჩევანში ნაციონალური მოძრაობის სიის პირველმა ნომერმა, დავით ბაქრაძემ, განაცხადა.
„ეს არის კომპანია, რომელიც შედის მსოფლიო ხუთეულში. შეიძლება ითქვას, რომ ეს არის მერსედესის მსგავსი კომპანია. ეს არის მერსედესი და, თუ ვინმემ ტარება არ იცის, ეს ამ კომპანიის ბრალი არ არის. კვლევა არის, როგორც თერმომეტრი და, როდესაც თერმომეტრი გიჩვენებს, რომ სიცხე გაქვს, შეიძლება ერთს არ დაუჯერო, მაგრამ, როცა მეორე თერმომეტრიც, მესამე თერმომეტრიც და მეოთხე თერმომეტრიც გიჩვენებს, რომ სიცხე გაქვს, უნდა დაფიქრდე, რომ ეგება მართლა სიცხე გაქვს და მიზეზები გაარკვიო. ქართული ოცნება თერმომეტრებთან ბრძოლით არის დაკავებული, ნაცვლად იმისა, რომ ნახოს რატომ აქვს სიცხე,“- განაცხადა დავით ბაქრაძემ.
ნაციონალური მოძრაობის ლიდერმა გადაცემა არჩევანში დღეს პარტიის მიერ წარმოდგენილი ეკონომიკური პროგრამის დეტალებზეც ისაუბრა.
