რუსეთის პრეზიდენტი ვლადიმერ პუტინი სანქტ-პეტერბურგში ირანის საგარეო საქმეთა მინისტრს, აბას არაღჩის შეხვდა. შეხვედრის მთავარი თემა ახლო აღმოსავლეთში მიმდინარე ესკალაცია და ირანის წინააღმდეგ არსებული საერთაშორისო წნეხი იყო.
რუსული სახელმწიფო მედიის (RIA Novosti) ცნობით, პუტინმა დაადასტურა მოსკოვის მზადყოფნა, მაქსიმალურად დაეხმაროს თეირანს:
„ჩვენი მხრიდან ყველაფერს გავაკეთებთ, რაც თქვენს ინტერესებსა და რეგიონის ხალხების ინტერესებს ემსახურება, რათა მშვიდობა რაც შეიძლება მალე იქნას მიღწეული“, — განაცხადა პუტინმა.
რუსეთის პრეზიდენტმა იმედი გამოთქვა, რომ ირანელი ხალხი წარმატებით გადალახავს ამ „რთულ პერიოდს“, რაც სავარაუდოდ აშშ-ის მიერ დაწესებულ ბლოკადასა და საომარ მოქმედებებს გულისხმობს.
