“ევროპელი დემოკრატების” ლიდერი, პაატა დავითაია მოუწოდებს ხელისუფლებას, ოკუპირებული ტერიტორიების პერიმეტრზე ე.წ. საგუშაგოები განალაგოს.
დავითაიას განმარტებით, პრინციპი, რომ რუსეთი არ გავაღიზიანოთ, საქართველოს დედაქალაქში – რუსული დროშის აღმართვით დამთავრდება.
“ე.წ. საზღვრების გადმოწევა საქართველოს მთავრობის მხრიდანეს პოლიტიკის არქონის გამო ხდება. მოვუწოდებ ხელისუფლებას, ე.წ. საგუშაგოები, ბლოკ-პოსტები მთელ პერიმეტრზე განალაგონ. ნუ ეშინიათ ოკუპანტების, ნუ ეშინიათ იმისა, რომ ვირაცა რაღაც პროვოკაციას მოაწყობს, თორემ პრინციპი იმასთან დაკავშირებით, რომ არ გავაღიზიანოთ რუსეთი – დამთავრდება იმით, რომ რუსული დროშა იქნება თბილისში. ამიტომ, კიდევ ერთხელ მოვუწოდებ ხელისუფლებას, გაამკაცროს სიტუაცია ოკუპირებულ ტერიტორიებთან დაკავშირებით შექმნილი მდგომარეობიდან გამომდინარე”,- აღნიშნა დავითაიამ.
ცნობისათვის, 6 ივნისს, რუსეთის ფედერაციის საოკუპაციო ძალების მიერ ქარელის რაიონის, სოფელ ავლევის მიმდებარე ტერიტორიაზე ადგილობრივი მოსახლეობის მფლობელობაში არსებულ სასოფლო-სამეურნეო სავარგულებზე ე.წ. საზღვრის აღმნიშვნელი ბანერები უკანონოდ აღმართეს.
