მიუხედავად უპრეცედენტო ინიციატივისა „ნაციონალური მოძრაობა“ ამჯერადაც სამარცხვინოდ იქცევა-მამუკა მდინარაძე

ფრაქცია ,,ქართული ოცნების” თავმჯდომარე მამუკა მდინარაძე პრემიერ-მინისტრის გადაწყვეტილებასთან დაკავშრებით განცხადებას ავრცელებს. “თაიმერი” მდინარაძის განცხადებას უცვლელად გთავაზობთ:

,,გუშინ პრემიერ-მინისტრმა საზოგადოებას გააცნო ჩვენი მოსახლეობის უმნიშვნელოვანესი გადაწყვეტილება, რომელიც ასობით ათას ოჯახს უმძიმესი ტვირთისგან ათავისუფლებს.

საბანკო-საფინანსო ორგანიზაციების ე.წ. შავ სიებში მყოფი 600 ათასზე მეტი ადამიანი, მათ შორის 150 000 სოციალურად დაუცველი და შეზღუდული შესაძლებლობის ათობით ათასი პირი ახალ წელს ვალების გარეშე შეხვდება!

ეს ეხება ყველა იმ ადამიანს, კიდევ ერთხელ განვმარტავ, ვინც 2018 წლის 1 იანვრის მონაცემებით ე.წ. შავ სიაში იყო და ძირი თანხის სახით 2000 ლარამდე დავალიანება ჰქონდათ დარჩენილი!

საუბარია ყველაზე დაბალი შემოსავლის მქონე ადამიანებზე, ხალხზე, ვინც სამომხმარებლო სესხი აიღო კაბალური პირობებით, გაჭირვების, საკვების, თუნდაც ტოტალიზატორის გამო აიღო და იმედი ჰქონდათ, რომ გადაიხდიდნენ, მაგრამ ვალის გასტუმრება ვერ შეძლეს. მათ შორის, ათასობით სოციალურად დაუცველი და შეზღუდული შესაძლებლობის მქონე პირია.

საერთო ჯამში, საუბარია 1.5 მილიარდი ლარის ღირებულების ვალზე, რომელსაც ფონდი „ქართუ“ გამოისყიდის ამ ორგანიზაციებისგან და გაანულებს!

ხაზგასმით აღვნიშნავ, რომ ბიუჯეტიდან ამისათვის არ იხარჯება არც ერთი თეტრი

ამ უმნიშვნელოვანესი ნაბიჯით, ჩვენს ხალხს, ვისაც ვალები წლების განმავლობაში ბორკილებად ედო, საშუალება ექნებათ სრულფასოვნად ჩაერთონ ეკონომიკურ აქტივობაში.

მიუხედავად ასეთი მასშტაბური და უპრეცედენტო ინიციატივისა, მითუმეტეს, რომ ბიუჯეტიდან არცერთი თეთრი არ იხარჯება ამისათვის, „ნაციონალური მოძრაობა“ ამჯერადაც სამარცხვინოდ იქცევა და ადამიანებს სოციალური მდგომარეობის მიხედვით ანსხვავებს ერთმანეთისაგან.

ორი დღის განმავლობაში, ვხედავთ, რომ „რუსთავი 2“-ის ეთერებსა თუ სოციალური ქსელში მათი ლიდერები და მხარდამჭერები აგდებით მოიხსენიებენ ადამიანებს, ვისაც წლების განმავლობაში ვალები ამოსუნთქვის საშუალებას არ აძლევდა! მათზე ზრუნვას დანაშულად და მოსყიდვად ასაღებენ!

მათგან განსხვავებით, „ქართული ოცნების“ ხელისუფლება, ვისთვისაც ამოსავალი წერტილი იყო, არის და იქნება ადამიანი, ზრუნავს ჩვენს თითოეულ მოქალაქეზე, მიუხედავად იმისა, თუ რის გამო დაუგროვდათ ვალი ამ ადამიანებს და რის გამო ჩავარდნენ გაჭირვებაში.

სოციალური სოლიდარობის აქტის შემდეგ, პანიკაში ჩავარდნილი „ნაციონალური მოძრაობა“ და „რუსთავი 2“ რეალობის მოდელირებასა და ფაქტების ტოტალურ გაყალბებაზეა გადასული, რასაც ცხადჰყოფს კიდეც მათი რეაქციები ადამიანებისთვის ვალების ჩამოწერასთან დაკავშირებით, მთელი ორი დღის განმავლობაში ჩვენ ამას ვხედავთ.

რაც შეეხება ვითომდა დანაშაულს, რაზეც უტიფრად იტყუებიან. შეგახსენებთ, ეს ის ხალხია, ვინც ვითომდა საბანკო ვალების გასტუმრების დაპირებით, რეგიონებში მთელი ბოლო პერიოდის განმავლობაში, საარჩევნო პერიოდში ყალბ ვაუჩერებს არიგებდნენ.

დარწმუნებული ვარ, რაც არ უნდა მოიმოქმედოს „ნაციონალურმა მოძრაობამ“, როგორი დახვეწილი ტყუილებიც არ უნდა გაავრცელოს, ხალხი ბრძენია და ქართული საზოგადოება არასდროს წამოეგება მათ ანკესზე არასდროს წამოეგება.”-აცხადებს მამუკა მდინარაძე

banner
წინა სტატიაში,,დავალიანების განულების დადებითი ნაბიჯი, რომელიც მთავრობამ და ფონდმა „ქართუმ“ გადადგეს, ეკონომიკას კარგ სტიმულაციას მისცემს”
შემდეგი სტატია,,პირი „შავ სიაში“ ნეგატიური სტატუსით არ დარჩება, თუმცა ახალი სესხის აღება, გარკვეულ გარემოებაზე იქნება დამოკიდებული”