პრეზიდენტის საპარლამენტო მდივანი ვენეციის კომისიის დელეგაციას შეხვდა

საქართველოს პრეზიდენტის საპარლამენტო მდივანი გიორგი კვერენჩხილაძე თბილისში ვიზიტად მყოფ ვენეციის კომისიის დელეგაციას შეხვდა.
როგორც “თაიმერს” საქართველოს პრეზიდენტის ადმინისტრაციიდან აცნობეს, შეხვედრისას საუბარი “საარჩევნო კოდექსში” განხორციელებულ ცვლილებებს შეეხო.

გიორგი კვერენჩხილაძის განცხადებით, ვენეციის კომისიის დელეგაცია დაინტერესდა საქართველოს პრეზიდენტის მოსაზრებებით, ზოგადად განხორციელებულ ცვლილებებსა და საარჩევნო რეფორმასთან დაკავშირებით.

“კომისიის დელეგაციას მივაწოდეთ ინფორმაცია “საარჩევნო კოდექსში” განხორციელებულ ცვლილებებთან დაკავშირებით, რომელიც საკონსტიტუციო სასამართლოს გადაწყვეტილების აღსრულებას ემსახურებოდა. ასევე, დეტალურად ვესაუბრეთ საარჩევნო სისტემის რეფორმაზე – იმ თანხმობებთან, თუ აზრთა სხვადასხვაობასთან დაკავშირებით, რომელიც ამ პროცესში წარმოიშვა.

შედეგად, ვენეციის კომისიისთვის ნათელი გახდა, უკანასკნელ პერიოდში საქართველოში განვითარებული ის პოლიტიკური პროცესები, რომელიც საარჩევნო სისტემის რეფორმასთან დაკავშირებით მიმდინარეობს”, – განაცხადა გიორგი კვერენჩხილაძემ.

banner
წინა სტატიაშიანდრონიკაშვილის ქუჩაზე, წყალსადენის მაგისტრალის აღდგენითი სამუშაოები ხვალ დასრულდება
შემდეგი სტატიასამხედრო მარშის კონკურსზე გამოვლენილი საუკეთესო მარშები 26 მაისს შესრულდება