ფოთის პორტი: აშშ-ის სამხედრო გემი ტექნიკური მიზეზის გამო ვერ შემოვიდა, ჩვეულებრივი რამ მოხდა

region
ავტ.: region სექტემბერი 18, 2019 15:30

ფოთის პორტი: აშშ-ის სამხედრო გემი ტექნიკური მიზეზის გამო ვერ შემოვიდა, ჩვეულებრივი რამ მოხდა

მას შემდეგ, რაც ფოთის პორტში ამერიკულმა სამხედრო ხომალდმა შესვლა ვერ შეძლო და ამას საზოგადოების კრიტიკა მოჰყვა, პორტის საზოგადოებასთან ურთიერთობის სამსახურმა დღეს, 18 სექტემბერს  პირველი კომენტარი გააკეთა.

პორტი ირწმუნება, რომ ამერიკულმა სამხედრო ხომალდმა შემოსვლა მხოლოდ ტექნიკური მიზეზების გამო ვერ შეძლო, ხოლო ის, რაც მოხდა, “ჩვეულებრივი პროცესის ნაწილია და საეჭვო არაფერია”.

“ოფიციალური კომენტარი არ გაგვიკეთებია, მე ასეთი დირექტივა მაქვს, რომ არც გავაკეთებთ, მაგრამ გეტყვით, რომ მსგავსი რამეები ხდება ხოლმე. ეს იყო ჩვეულებრივი საოპერაციო პროცესი, რაც მოხდა სრულიად, აბსოლუტურად ტექნიკური მიზეზების გამო.

არაფერი საეჭვო მანდ ნამდვილად არ არის. ეს არის ჩვეულებრივი, ნორმალური საოპერაციო პროცესი, რომ გემის დატვირთვა იგვიანებს. დატვირთვის დასრულება დაგეგმილ დროში ვერ მოხერხდა ისევ პორტისგან დამოუკიდებელი მიზეზების გამო. შესაბამისად, ეს გემი გველოდა, გველოდა და ბოლოს გადაწყვიტეს, რომ აღარ შემოსულიყვნენ. ეს არ არის არაფერი ფენომენალური მოვლენა. რაღაც განსაკუთრებული მოთხოვნა, შეტყობინება არ გვქონია. აშშ-ის საელჩომ ძალიან კარგი განცხადება გააკეთა. საელჩოს განცხადება იყო სავსებით ამომწურავი, რომ არ გვინდოდა, ხელი შეგვეშალა კომერციული საქმიანობისთვის.

სენსაციური არაფერი მომხდარა, გარდა იმისა, რომ რუსულმა საინფორმაციო წყარომ ეს გაავრცელა და აგორდა ამბავი. თორემ პორტში დაგვიანებები ხდება, მომხდარა და კიდევ მოხდება. საათივით აწყობილი მექანიზმი არ არის, სამწუხაროდ.

ჩვეულებრივი კონტეინერმზიდი გემი იყო. აქ ჩამოცალეს და იტვირთებოდა კიდევ. ეს კონტეინერები სხვადასხვა ტერიტორიებიდან მოდის, ყველა კონტეინერი პორტში არ არის დასაწყობებული, იქ რაღაცა გამოვიდა წყობიდან. მთელი ლოჯისტიკური ჯაჭვი. ვინც იცნობს ამ საქმეს, ის ძალიან კარგად მიხვდება, რომ ეს არის ჩვეულებრივი მოვლენა, ჩვეულებრივი მოვლენა მოხდა”, – უთხრა ტაბულას პორტის საზოგადოებასთან ურთიერთობის სამსახურის ხელმძღვანელმა, ლელა კვანტალიანმა.

ინფორმაცია, რომ ამერიკული სამხედრო ხომალდი შესახებ ინფორმაცია თავდაპირველად რუსულმა მედიამ 15 სექტემბერს გაავრცელა.

რუსული მედია წერს, რომ ამერიკული სამხედრო გემი USNS Yuma საქართველოს ტერიტორიული წყლებში 10 საათზე მეტი ხნის განმავლობაში იმყოფებოდა, თუმცა, პორტში შესვლის საშუალება არ მიეცა.

თავდაცვის სამინისტროში ტაბულას უთხრეს, რომ მსგავსი საკითხები უწყებას არ ეხება და ამ საკითხის შესახებ კომენტარი შსს-ის სასაზღვრო პოლიციის დეპარტამენტში უნდა გააკეთონ.

სასაზღვრო პოლიციის დეპარტამენტმა ტაბულა ფოთის პორტში გადაამისამართა. უწყების განმარტებით, ეს სწორედ პორტს ეხება, ვინაიდან ის კერძოა და გემების შესვლა-არშესვლის საკითხიც სწორედ პორტის დონეზე წყდება.

ინფორმაცია, რომ ამერიკული სამხედრო ხომალდი ფოთის პორტში ვერ შევიდა, საქართველოში აშშ-ის ელჩის მოვალეობის შემსრულებელმა, ელიზაბეთ რუდმაც დაადასტურა. კომენტარის მიხედვით, რომელიც საელჩოდან ტაბულას მიაწოდეს, ამის მიზეზი “არშეშვება არ ყოფილა”.

“გემის არშეშვება არ ყოფილა. ამერიკული გემი USNS Yuma ფოთის ნავსადგურში საწვავის მარაგის შესავსებად შემოდიოდა, თუმცა ნავსადგური კომერციული გემის მიერ იყო დაკავებული. იმის გამო, რომ კომერციულ მიზნებს ხელი არ შეშლოდა, ამერიკულმა ხომალდმა ფოთის პორტი დატოვა და გზა თავისი გრაფიკით გააგრძელა”, – ამბობს აშშ-ის ელჩის მოვალეობის შემსრულებელი.

 

წყარო: tabula.ge

region
ავტ.: region სექტემბერი 18, 2019 15:30

გამოკითხვა

ამჟამად არცერთი გამოკითხვა არ მიმდინარეობს.

Google სტატისტიკა


5,698
ვიზიტორი
დღეში
Powered By Google Analytics