საკონსტიტუციო სასამართლოში პოლიტიკური პარტიების აკრძალვაზე სახელისუფლო გუნდის სარჩელის განხილვა 22 ოქტომბერს, 12:00 საათზე გაგრძელდება. სასამართლოს თავმჯდომარის, რევაზ ნადარაიას განცხადებით, პლენუმი ჯერ კიდევ შუამდგომლობების განხილვის ეტაპზეა.
საქმეს 7 მოსამართლის შემადგენლობით პლენუმი იხილავს. საუბარია პარლამენტის 88 დეპუტატის სარჩელზე, რომელიც ხუთი ოპოზიციური გაერთიანების — „ერთიანობა − ნაციონალური მოძრაობის“, „კოალიცია ცვლილებისთვის“, „ძლიერი საქართველოს“, „ფედერალისტური პარტიისა“ და პარტიის „გახარია საქართველოსთვის“ არაკონსტიტუციურად ცნობასა და საქმიანობის აკრძალვას ითხოვს.
მმართველი გუნდის არგუმენტით, აღნიშნული პარტიები 2016 წლიდან უარყოფენ ხელისუფლების ლეგიტიმაციას, მოქმედებენ როგორც კოალიციური ერთობა და მათი საქმიანობა კონსტიტუციური წყობილების დამხობისკენ, საბოტაჟისა და ქვეყნის ტერიტორიული მთლიანობის ხელყოფისკენ არის მიმართული. სარჩელს თან ერთვის XI მოწვევის პარლამენტის დროებითი საგამოძიებო კომისიის დასკვნა.
საქმის არსებითი განხილვა 21, 22 და 23 ოქტომბერს არის დაგეგმილი.

















