გამოცემა Politico-ს ინფორმაციით, რუსეთის სამხრეთ საზღვარზე, საქართველოს მიმართულებით, რუსეთის მოქალაქეთა მასობრივი გადინება მეორდება.
სტატიის თანახმად, გასულ კვირას, ზემო ლარსის საკონტროლო-გამშვები პუნქტის გავლით, საქართველოში რუსეთის 113 000-ზე მეტი მოქალაქე შევიდა. გამოცემა აღნიშნავს, რომ გადაადგილების ეს მკვეთრი ზრდა უკავშირდება მზარდ შიშს კრემლის მიერ მობილიზაციის ახალი ტალღის შესაძლო გამოცხადების შესახებ.
Politico-ს ცნობით, რუსეთის ხელისუფლებამ ბოლო თვეებში გააძლიერა რეზერვისტების შესახებ მონაცემების შეგროვება, გაამკაცრა ზომები საკონტრაქტო სამხედროების გასაწვევად და გააფართოვა „როსგვარდიის“ უფლებამოსილებები მობილიზაციის შემთხვევისთვის.
გარდა ამისა, უფლებადამცველები აფიქსირებენ გაწვევის ასაკის მამაკაცებისგან — განსაკუთრებით კი თადარიგში მყოფთაგან — დახმარების თხოვნით მიმართვების მკვეთრ ზრდას.
ამავდროულად, კრემლი უარყოფს გავრცელებულ ცნობებს ახალი მობილიზაციის შესახებ და აცხადებს, რომ მასობრივი გაწვევა საჭირო არ არის და არც იგეგმება.
