საარჩევნო სისტემის ცვლილებასთან დაკავშირებით პარლამენტის თავმჯდომარე ირაკლი კობახიძე კონკრეტულ საუბარს თავს არიდებს და ამბობს, რომ მმართველ გუნდს არც ერთ ნორმაზე აქვს წინასწარ გადაწყვეტილება მიღებული და მასზე მსჯელობა საკონსტიტუციო კომისიაში მოხდება.
ამის შესახებ ირაკლი კობახიძემ გადაცემა არჩევანში ისაუბრა.
„ჩემი მოსაზრება თუ გაინტერესებთ, რაც უფრო პროპორციულია სისტემა, მით უკეთესია პოლიტიკური სისტემის განვითარებისათვის, თუმცა დეტალურად განხილვაში არ ჩავალ. რისკები აქვს პროპორციულ სისტემასაც. მაგალითად, პროპორციული სისტემის პირობებში ძალიან რთულდება სტაბილური უმრავლესობის ჩამოყალიბება,“ – განაცხადა ირაკლი კობახიძემ, რომელმაც ასევე აღნიშნა, რომ მმართველ გუნდში არც პრეზიდენტის არჩევის წესთან დაკავშირებით არსებობს საბოლოო გადაწყვეტილება და ამ საკითხის განხილვაც მოხდება საკონსტიტუციო კომისიაში.
„ერთადერთი რისი პირობაც შემიძლია დავდო არის ის, რომ დოკუმენტი ვენეციის კომისიაში გაიგზავნება და ის იქნება მთავარი არბიტრი და არც ერთი ისეთი ნორმა არ იქნება მიღებული, რომელიც ვენეციის კომისიის მიერ ნეგატიურად შეფასდება,“ – განაცხად ირაკლი კობახიძემ.
