დღევანდელ სხდომაზე ორი კენჭისყრა ჩატარდა. თავდაპირველად, მხარი დაუჭირეს ირაკლი შოთაძის საქართველოს კანონმდებლობასთან შესაბამისობის დადგენას. კომიტეტზე შოთაძემ რავა ხმა მიიღო.
ფარული კენჭისყრით ასევე დაუჭირეს მხარი იურიდიული კომიტეტის დასკვნას, რომლითაც კომიტეტი გასცემს რეკომენდაციას გენერალური პროკურორობის კანდიდატი ირაკლი შოთაძე არჩეულ იქნეს საქართველოს გენერალურ პროკურორად. აღნიშნულ კენჭისყრაზე შოთაძემ ასევე რვა დეპუტატის მხარდაჭერა მიიღო.
შოთაძეს კომიტეტის სხდომაზე ექვს საათზე მეტ ხანს უსმენდნენ. სხდომას არ ესწრებოდნენ „ნაციონალური მოძრაობისა“ და „ევროპული საქართველოს“ წარმომადგენლები.
პარლამენტს ირაკლი შოთაძის კანდიდატურა საპროკურორო საბჭომ წარუდგინა. ირაკლი შოთაძის კანდიდატურას პლენარულ სხდომაზე კენჭი შესაძლოა, მიმდინარე კვირაში ეყაროს. ირაკლი შოთაძეს თანამდებობაზე არჩევისთვის 76 დეპუტატის მხარდაჭერა დასჭირდება.
საპროკურორო საბჭომ ფარული კენჭისყრის შედეგად საქართველოს გენერალური პროკურორობის კანდიდატად ირაკლი შოთაძე 7 თებერვალს შეარჩია. კანონმდებლობის გათვალისწინებით, პარლამენტი გენერალურ პროკურორს ექვსი წლის ვადით ირჩევს.
