საფრანგეთმა გაეროს უშიშროების საბჭოს რეზოლუციის პროექტი მოამზადა, რომელიც ჰორმუზის სრუტეში ნავიგაციის აღდგენის მიზნით საერთაშორისო მისიის შექმნას ითხოვს. საფრანგეთის საგარეო უწყების განცხადებით, პარიზი დოკუმენტს კენჭისყრაზე შესაბამისი პირობების შექმნისთანავე წარადგენს.
ამ ვიწრო საზღვაო დერეფანზე კონტროლი, რომელიც გლობალური ენერგოვაჭრობის უმნიშვნელოვანესი არტერიაა და რომლის ფაქტობრივმა ბლოკადამ ნავთობის ფასების მკვეთრი ზრდა გამოიწვია, მთავარი დაბრკოლებაა აშშ-ირანის სამთვიანი ომის დასრულების შესახებ მიმდინარე მოლაპარაკებებში.
პარიზის ეს ინიციატივა მას შემდეგ გაჟღერდა, რაც ვაშინგტონს გაეროში საკუთარი რეზოლუციის გატანა გაუჭირდა. აშშ-ისა და ბაჰრეინის ერთობლივი პროექტი, რომელიც ირანისგან თავდასხმებისა და სრუტის დანაღმვის შეწყვეტას მოითხოვს, ორ კვირაზე მეტია განხილვის პროცესშია, თუმცა ჩინეთი და რუსეთი მასზე ვეტოს დადებით იმუქრებიან და აცხადებენ, რომ ტექსტი თეირანის მიმართ მიკერძოებულია.
ვაშინგტონმა ვეტოს თავიდან ასაცილებლად 140-მდე ქვეყნის მხარდაჭერა მოიპოვა, თუმცა საფრანგეთი, როგორც უშიშროების საბჭოს მუდმივი წევრი, ამ დრომდე უარს ამბობს ამერიკული ვერსიის მხარდაჭერაზე.
„ამჟამად განხილვის პროცესშია აშშ-სა და ბაჰრეინის რეზოლუციის პროექტი, რომელიც მიმდინარე დისკუსიების საფუძველს წარმოადგენს. კენჭისყრის თარიღი ჯერჯერობით ცნობილი არ არის“, — განაცხადა საფრანგეთის საგარეო საქმეთა სამინისტროს სპიკერმა პასკალ კონფავრემ.
