პაპუაშვილი – ქართველი სამხედროები იცავთ წინაპრების თავგანწირვით მოპოვებულ ჩვენი ქვეყნის დამოუკიდებლობას, ხართ ის ბურჯი, რაზეც დგას ჩვენი სამშობლოს, ჩვენი შვილების მშვიდობიანი მომავალი

თქვენ იცავთ წინაპრების თავგანწირვით მოპოვებულ ჩვენი ქვეყნის დამოუკიდებლობასა და თავისუფლებას, თქვენ ხართ ის ბურჯი, რაზეც დგას ჩვენი სამშობლოს, ჩვენი შვილების მშვიდობიანი მომავალი, – განაცხადა პარლამენტის თავმჯდომარემ, შალვა პაპუაშვილმა საქართველოს თავდაცვის ძალების დღისადმი მიძღვნილ ღონისძიებაზე და სამხედროების მიულოცა დღევანდელი თარიღი.

„ქართველ სამხედროებს საერთაშორისო პარტნიორების მხარდამხარ მსოფლიოს სხვადასხვა წერტილში წარმატებით შეაქვთ წვლილი გლობალურ მშვიდობასა და უსაფრთხოებაში. რაც მთავარია, თქვენ იცავთ წინაპრების თავგანწირვით მოპოვებულ ჩვენი ქვეყნის დამოუკიდებლობას და თავისუფლებას. თქვენ ხართ ის ბურჯი, რაზეც დგას ჩვენი სამშობლოს, ჩვენი შვილების მშვიდობიანი მომავალი.

საამაყოა, რომ დღევანდელ დღეს ჩვენი თავდაცვის ძალები რთული დავალებების შესასრულებლად შესაბამისად აღჭურვილი, მომზადებული და ბრძოლისუნარიანია. საქართველოს თავდაცვის ძალები თავსებადია ნატოს სტანდარტებთან და ამ კუთხით ნატოსთან თანამშრომლობა მომავალშიც გაგრძელდება.

საქმით, ქვეყნისა და ხალხისადმი ერთგულებით, თქვენ არაერთხელ დაამტკიცეთ, რომ ხართ ჩვენი საზოგადოების ღირსეული წევრები. საქართველოს თანამედროვე ისტორიაში ყველაზე რთულ დროსაც კი თქვენ იდექით იქ, სადაც უნდა მდგარიყო ნამდვილი პატრიოტი და ქვეყანაზე გულანთებული ადამიანი – სამშობლოს, ოჯახის, თითოეული თანამემამულის სიცოცხლის, თითოეული ჩვენგანის უკეთესი მომავლის იმედების სადარაჯოზე. ამიტომაც არის, რომ საქართველოს ჯარი ჩვენი მოქალაქეების განსაკუთრებული პატივისცემითა და სიყვარულით სარგებლობს“, – განაცხადა შალვა პაპუაშვილმა.

პარლამენტის თავმჯდომარემ აღნიშნა, რომ საქართველოს უკიდურესად რთულ და დაძაბულ უსაფრთხოების გარემოში უწევს განვითარება.

„რუსეთის აგრესია უკრაინაში და ჩვენს რეგიონში არსებული არასტაბილურობა რეალურ და არსებით საფრთხეს წარმოადგენს საქართველოსთვის, მთელი ევროპისა და საერთაშორისო წესრიგისთვის. შემაშფოთებელია ასევე ჩვენი ქვეყნის ორ ისტორიულ რეგიონში არსებული მძიმე მდგომარეობა და რუსეთის მიმდინარე ოკუპაცია, აგრეთვე, ჰიბრიდული თავდასხმები და სხვა თანამედროვე გამოწვევები.

ეს განამტკიცებს ჩვენს რწმენას ძლიერი თავდაცვის ძალების აუცილებლობის შესახებ. საქართველოს პარლამენტის სახელით, კიდევ ერთხელ გიდასტურებთ ჩვენს სრულ მხარდაჭერას და თანადგომას.

საქართველოს თავდაცვის ძალების დღის აღნიშვნასთან ერთად, პატივს მივაგებთ საქართველოს ერთიანობისათვის ბრძოლაში და სამსახურებრივი მოვალეობის შესრულების დროს დაღუპულ სამხედრო მოსამსახურეთა ხსოვნას. მათი ღვაწლი და დამსახურება საქართველოს წინაშე ფასდაუდებელია, მათი სახელი და გმირობა კი სამუდამოდ დარჩება ჩვენი ერის მეხსიერებაში.

კიდევ ერთხელ გილოცავთ საქართველოს თავდაცვის ძალების დღეს და მადლობას გიხდით ღირსეული და სამაგალითო სამსახურისთვის“, – განაცხადა შალვა პაპუაშვილმა.

წინა სტატიაში“ლენდ-ლიზი” უკრაინასა და მთელ თავისუფალ სამყაროს დაეხმარება, რომ ნაცისტების იდეოლოგიური მემკვიდრეები დაამარცხონ – ზელენსკი
შემდეგი სტატია23 200 ჯარისკაცი, 1 008 ტანკი, 190 თვითმფრინავი – რუსი ოკუპანტების დანაკარგი