იუსტიციის მინისტრმა პაატა სალიამ ჟურნალისტებთან საუბრისას სპეკულაცია უწოდა ბრალდებას, თითქოს პენიტენციური სამსახური ელენე ხოშტარიასთან მკურნალი ექიმის შესვლას ხელოვნურად აფერხებს. მინისტრის განმარტებით, შეფერხების რეალური მიზეზი ისაა, რომ უწყებას ექიმის პირადობის მოწმობისა და მისი სპეციალიზაციის დამადასტურებელი დოკუმენტის ასლები ვერ მიაწოდეს.
სალიას თქმით, პენიტენციური სამსახური მზად არის დაუშვას ექიმი, როგორც კი საჭირო დოკუმენტაცია წარდგენილი იქნება. რაც შეეხება ხოშტარიას ჯანმრთელობის მდგომარეობას, მინისტრი აცხადებს, რომ საგანგაშო არაფერია:
„საბედნიეროდ, ის დიაგნოზი, რაზეც მას ეჭვი ჰქონდა, გამოირიცხა. ახლა მიმდინარეობს დამატებითი შემოწმებები და რაიმე საგანგაშო მდგომარეობა ამჟამად არ არის, როგორც ჩვენ ვიცით სამედიცინო პერსონალისგან. კიდევ ერთხელ ვიმეორებ, მოიტანონ შესაბამისი დოკუმენტაცია, შებრძანდეს ექიმი“, — განაცხადა პაატა სალიამ.
