ოპოზიციური პარტიები საქართველოს პარლამენტის თავმჯდომარეს არჩილ თალაკვაძეს მიმართავენ

ოპოზიციური პარტიები საქართველოს პარლამენტის თავმჯდომარეს არჩილ თალაკვაძეს მიმართავენ.

განცხადების თანახმად, ოპოზიციური პარტიები მოითხოვენ, საარჩევნო კანონმდებლობის რეფორმირების საკითხზე შექმნილი სამუშაო ჯგუფის მონაწილეთა რაოდენობის გაზრდას. განცხადებაში ნათქვამია, რომ მონაწილე პარტიათა ჩამონათვალის გადახედვას აუცილებელს ხდის ხელისუფლების მიერ პროპორციული საპარლამენტო არჩევნების 2020 წელს დაანონსება უბარიერო/ბუნებრივი ბარიერის პირობებში.

„ამა წლის 13 ივნისს, საქართველოს პარლამენტის იმდროინდელი თავმჯდომარის ხელმძღვანელობით, საარჩევნო კანონდმებლობის რეფორმირების საკითხზე შექმნილი სამუშაო ჯგუფის პირველი სამუშაო შეხვედრა ჩატარდა.

აღნიშნულ შეხვედრაზე ირაკლი კობახიძემ განაცხადა, რომ სამუშაო ჯგუფის პარტიული მონაწილეები განისაზღვრა მმართველი გუნდის მიერ იმ გათვლით, რომ მომდევნო საპარლამენტო არჩევნებში მხოლოდ მოწვეულ პარტიებს გააჩნდათ „ბარიერის გადალახვის თეორიული შანსიც კი“. აღნიშნული პარტიები, როგორც თქვენთვის ცნობილია, მოიცავს საპარლამენტო (ევროპული საქართველო – მოძრაობა თავისუფლებისთვის, ერთიანი ნაციონალური მოძრაობა, პატრიოტთა ალიანსი), ისევე როგორც არასაპარლამენტო პარტიებს (ლეიბორისტული პარტია, დემოკრატიული მოძრაობა – გაერთიანებული საქართველო, თავისუფალი საქართველო, ლეიბორისტული პარტია).

მივიჩნევთ, რომ ხელისუფლების მიერ პროპორციული საპარლამენტო არჩევნების 2020 წელს დაანონსება უბარიერო/ბუნებრივი ბარიერის პირობებში აუცილებელს ხდის მონაწილე პარტიათა ჩამონათვალის გადახედვას, სწორედ იმ ლოგიკიდან გამომდინარე, რისი არტიკულაციაც მოახდინა ზემოხსენებულ შეხვედრაზე ირაკლი კობახიძემ. იმის გათვალისწინებით, რომ მმართველმა პარტიამ პარლამენტში უკვე დაარეგისტრირა და ფორმალური პრეზენტაციის სახით წარადგინა საკანონდმებლო ინიციატივა, რომელიც მოიცავს ბუნებრივ ბარიერს და ამით დააფიქსირა საკუთარი მოლოდინი, რომ მომდევნო საპარლამენტო არჩევნები ჩატარდება პროპორციული წესით ბუნებრივი ბარიერის პირობებში, არსებითად იზრდება იმ პარტიათა ჩამონათვალი, რომლებიც უნდა შევიდეს საარჩევნო კანონმდებლობის რეფორმირების საკითხზე შექმნილ სამუშაო ჯგუფში. შესაბამისად, მივიჩნევთ, რომ, აუცილებელია, მოხდეს აღნიშნული სამუშაო ჯგუფის მონაწილეთა გაფართოვება რათა უზრუნველყოფილ იქნას ჯგუფის ინკლუზიურობა მომდევნო შეხვედრამდე (8-10 ივლისი).

ველით თქვენს გადაწყვეტილებას აღნიშნულ საკითხთან დაკავშრებით უმოკლეს ვადაში“, – ნათქვამია ოპოზიციური პარტიების ერთობლივ განცხადებაში, რომელსაც ხელს აწერენ: ახალი მემარჯვენეები, ახალი საქართველო, ახალი ქრისტიან-დემოკრატიული პარტია, ევროპელი დემოკრატები, ევროპული საქართველო – მოძრაობა თავისუფლებისთვის, ემსახურე საქართველოს, ერთიანი ნაციონალური მოძრაობა, ეროვნულ-დემოკრატიული პარტია, თავისუფალი დემოკრატები, კანონი და სამართალი, რესპუბლიკური პარტია, სამოქალაქო ალიანსი, სახელმწიფო ხალხისთვის, ქრისტიან-დემოკრატიული მოძრაობა, ქრისტიან-კონსერვატიული პარტია.

banner
წინა სტატიაში,,რეგვენის და უვიცის გარდა ამას სახელმწიფო გადატრიალებას ვერავინ უწოდებს”-დავით ზურაბიშვილი
შემდეგი სტატიაპირველი რესპუბლიკის მოედნიდან დაწყებული მსვლელობა დასრულდა