„წალენჯიხელებო, დაგვიბომბეს დამეგობრებული ქალაქი“ – ეს გია ხარჩილავას სიტყვებია, როცა უკრაინის ქალაქი იავოროვი დაბომბეს. მაშინ ხარჩილავამ, წალენჯიხის მერმა, წალენჯიხას უთხრა, რომ დიახ, ეს მათ დაუბომბეს დაძმობილებული ქალაქი, მათი მეგობრები და ძმები დაბომბა ისტორიულმა მტერმა, მტერმა, რომლის ხელიც წალენჯიხის არაერთმა სოფელმა იწვნია.
ომის დაწყების პირველი წუთებიდანვე, წალენჯიხა ერთ–ერთი პირველი იყო, ვინც დაძმობილებულ ქალაქში გააგზავნა საკვები, სამოსი, მედიკამენტები.
როცა იავოროვი დაიბომბა, 13 მარტს, წალენჯიხაში დაარსდა ფონდი “სგფ წალენჯიხა”. (სოლიდარობისა და განვითარების ფონდი წალენჯიხა) და ამჯერად ის კი არ გააგზავნეს., რასაც თავად თვლიდნენ საჭიროდ, კითხეს დაძმობილებულ ქალაქს, რა უჭირდათ და აღმოჩნდა, რომ დიზელ–გენერატორები და წყალსაქაჩაის ძრავები სჭირდებოდათ. სწორედ ამ ტექნიკის ფული შეაგროვა მაშინ წალენჯიხამ და გაუგზავნა დამეგობრებულ ქალაქს.
მაშინ, როცა თბილისის მერის მეგობარი, ყოფილი თანაგუნდელი, უკრაინის ფეხბურთის ფედერაციის პრეზიდენტი, ანდრეი შევჩენკო, თბილისის მერზე, კახა კალაძეზე ამბობს, რომ „კალაძე მისთვის აღარ არსებობს“, წალენჯიხის მერი, მაღალჩინოსნებიდან ერთადერთი იყო, ვისაც უკრაინაში მეგობრობა ჩაქონდა და ვისაც უკრაინაში როგორც ძმას ისე ელოდნენ. როგორც მერე გაირკვა, გია ხარჩილავას პირადი წვლილიც ჰქონდა უკრაინაში, გარდა წალენჯიხის სახელით ჩატანილი გადაუდებელი საჭიროების ნივთებისა.
ქართველი მეომარი უკრაინაში, ვანო ნადირაძე, წერდა: “მე მარტო ესეთი პოლიტიკოსების მწამს და მჯერა, პირველ რიგში როგორც კაცების.
წალენჯიხის მერი გია ხარჩილავა….. არც ქვეყანა მოუდია, არც უსელფავია ავტომატით, არც ვინმესთვის ნიშანი მოუგია რომ მე უკრაინაში ვარო…. უბრალოდ გადაიკიდა ზურგჩანთა და ჩამოვიდა…. ჩამოვიდა იქ სადაც მეომრები არიან!!!!”
გია ხარჩილავას გარდაცვალებისა და ე.წ. თვითმმართველობის არჩევნებში, სუსის ყოფილი მაღალჩინოსნის „გამარჯვებისა“ და წალენჯიხის მერად დასმის შემდეგ, „თაიმერის“ რედაქციაში ზარები არ წყდება, საჯარო მოხელეები გვატყობინებდნენ, რომ წალენჯიხის ახალი ხელისუფლება უკრაინის დროშის ჩამოხსნას აპირებს ქალაქში, მერიის შენობაზეც და უკრიანის კუთხე სადაცაა მოწყობილი, იქაც. ყველაზე დიდხანს მაინც ამაზე იფიქრეს, როგორ და როდის ჩამოეხსნათ. ჩამოხსნეს და უკრაინის დროშასთან ერთად, წალენჯიხის მერიის შენობიდან, ჩამოხსნეს საქართველოს და ევროკავშირის დროშები.
როგორც ჩანს, მმართველი გუნდიდან იყო დავალება – მმართველი გუნდის ერთ–ერთი ლიდერი, დიტო სამხარაძე, „დროშის ექსპერტი“ გამოდგა და ამტკიცებს, რომ საქართველოსა და ევროკავშირის დროშები არასწორად იყო გადაკერებული და ამიტომ ჩამოხსნეს, ანუ, ახლა ხალხმა რომ სწორად გადააკეროს, ბატონო დიტო და ისე მიიტანოს მერიაში, ჩამოკიდებენ? და მხოლოდ გადაკერებაშია პრობლემა?და უკრაინის დროშა რომ არ იყო გადაკერებული? მერიიდანაც და უკრაინის კუთხიდანაც კი რომ ჩამოხსენით? ეგ რას უნდა დავაბრალოთ?
წალენჯიხიდან ათობით ადამიანი იბრძვის რუსეთის წინააღმდეგ უკრაინაში, არაერთი ადამიანი დაიღუპა უკვე წალენჯიხიდან რუსეთთან ომში, არაერთი გმირის ცხედარი ჩამოასვენა წალენჯიხელმა ხალხმა, რუსეთთან მებრძოლი არაერთი ქართველი მებრძოლი სხეული მიიბარა წალენჯიხის მიწამ და ამ წალენჯიხაში, ოკუპაციური ხაზი რომ აქვს ცხვირწინ – უკრაინის კუთხიდან უკრაინის დროშა გაუქრე?
დიტო სამხარაძეს, „დროშის ახალ ექსპერტს“ განუცხადებია, წალენჯიხა დაუბრუნდა საქართველოსო – აქამდე ვისი იყო? აქამდე არ თვლიდნენ საქართველოდ? რომ ვამბობდით ხალხი და ჟურნალისტები, არ თვლიან წალენჯიხას საქართველოდო, გვლანძღავდნენ და აჰა, ისევ და ისევ, ამაშიც მართლები გამოვდექით.
დიტო სამხარაძე, „დროშის ექსპერტი“ ყოფილა და იქნებ, თავდაცვის სამინისტროების საჯარო დოკუმენტაციის წაკითხვა გაუჭირდეს, მაგრამ მაინც ნახოს, მისივე მთავრობის ხელმოწერილი დოკუმენტები, რომლის მიხედვითაც, საქართველოს ნომერ პირველი სამხედრო მოკავშირე უკრაინა იყო – რა შრომა აქვს საქართველოს თავდაცვაში უკრაინას ჩადებული, ნახოს და იქნებ, მცირედ მაინც შეაწუხოს სინდისმა.
თუმცა, მთავარი არც თავდაცვის დოკუმენტებია და არც დიტო სამხარაძის „დროშის ექსპერტობა“, მეტიც, არც ისაა მთავარი, ვისაც დღეს წალენჯიხა ჩააბარეს, მთავარი ხალხია და ზარები და მესიჯები არ წყდება რედაქციაში აღშფოთებული, გაბრაზებული ხალხის, რომლებიც თვლიან, რომ წალენჯიხელი, რუსეთთან ომში დაღუპული მეომრების ძვლებს დაადგა ფეხი ამ ნაბიჯით ხელისუფლებამ. ხალხი ბრძენია და ხალხის რისხვამ კალაპოტი თუ გაიდგა, მერე სამხარაძე რისი ექსპერტია და რისია არა, აღარავის დააინტერესებს.
„ომი რომ არ უნდა“, ის მთავრობა უკვე დროშებსაც ეომება – უკრაინის დროშასთან და ევროკავშირის დროშასთან ომი გაუჩაღებია და ამას რომ აპირებდა, ჯერ კიდევ მაშინ ვამბობდით, „ალტ–ინფოს“ რომ ევროკავშირის და უკრაინის დროშებს აწვევინებდა და ვიდეოებს ავრცელებინებდა. ქარის წისქვილებთან მეომარი გაგვიგია და დროშასთან მეომარი არ გაგვიგია ჯერ, იქნებ, იმიტომ რომ დროშებთან ომიც არავის მოუგია ჯერ. საქართველოს და ევროკავშირის დროშა არის ნაცურიო, ანუ, მხოლოდ ნაცებს სურთ ევროკავშირი და ამ ქვეყნის ევროპული მომავალი? სულხან–საბაც ნაცი იყო? დავით აღმაშენებელიც ნაცი იყო, ჯვაროსნებმა მაგიტომ ჩამოაკითხეს და გრიგოლ ხანძთელი საერთოდაც, აკაცუკი იქნებოდა და ილია ჭავჭავაძე დიფსთეისელი და ვაჟაზე უნდა დაკვალიანდეთ, ეგ სულაც კოსმოპოლიტენი იყო და ალბათ, უფრო მასონს დაუძახებთ და ალექსანდრე ყაზბეგი დღეს რომ ცოცხალი იყოს, უეჭველად ციხეში გეყოლებოდათ გამომწყვდეული.
„ორპირობამ გაგატუზა?
ვაი, ჩვენო ხარაბუზა“ – ეს აკაკიმ „ხარაბუზა ღენერალს“ უთხრა და რა ბედიაც მის ორპირა „ტუზს“ ეწია, თქვენც იმ ბედს დაიკვეხნით ისტორიაში.
2022 წელი, გია ხარჩილავა: “მივდივარ უკრაინის ქალაქ იავოროვში, მიმაქვს ჩემი მოსახლეობის განწყობები და სავსე ხელები – ეს არის ჰუმანიტარული ტვირთი, სოლიდარობის და განვითარების ფონდის, თქვენ მიერ გაღებული თანხებით შეძენილი ინფრასტრუქტურული საკითხის მოგვარებისთვის საჭირო, ფრონტისპირა ქალაქის ჰოსპიტალური სექტორის დასახმარებლად – დიზელ-გენერატორი, და ამასთან, მიმაქვს ერთობლივი ბრძოლის, თანადგომის და საუკუნოვანი მეგობრობის განწყობები.“
გია ხარჩილავას ამ სიტყვების თქმა, რომ მიაქვს უკრაინაში წალენჯიხელთა მეგობრობა, წალენჯიხელთა სავსე ხელები, წალენჯიხელთა განწყობები – იმიტომ შეეძლო რომ ასეთი იყო ხალხის ნება, ასეთია ხალხის ნება და წყალნი წავლენ და წამოვლენ, რუსეთის წინააღმდეგ წალენჯიხელთა, ქართველთა და უკრაინელთა ბრძოლა სისხლის ბოლო წვეთამდე, ისტორიას დარჩება, მტვერს ქარი წაიღებს და უკრაინის და ევროკავშირის დროშებს სახლებიდან გადმოვფენთ.
და მაინც, ანუ, სწორად „გადაკერებული“ საქართველოს და ევროკავშირის დროშები რომ მოგიტანოთ ხალხმა, გამოფენთ? თუ მხოლოდ გადაკერებაშია პრობლემა და თუ თქვენ ვერ ახერხებს სწორად გაკერვასაც კი, ხალხმა რომ გავაკეთოთ, რას იზამთ, გადმოფენთ?
როგორც სამეგრელოში იტყვიან – ჩვენს შორის მტყუანი ვინცაა, ვიცით – მტყუან მით ზოჯუნცუ ქომიჩქნა….
