მნიშვნელოვანია, ყველა რეკომენდაცია, რომელიც გაცემულია საქართველოს მთავრობის და პარლამენტის მიმართ შესრულებული იყოს, რათა ამ შეუსრულებლობამ არ შექმნას წინაღობა მოლაპარაკებების გახსნის პროცესში, – ამის შესახებ სახალხო დამცველმა, ლევან იოსელიანმა ჟურნალისტებთან საუბრისას განაცხადა.
მან ე.წ. „ვეტინგის“ სისტემაზე საუბრისას აღნიშნა, რომ ყველა გადაწყვეტილება შესაბამისობაში უნდა მოდიოდეს საქართველოს კონსტიტუციასთან.
„მნიშვნელოვანია, ყველა რეკომენდაცია, რომელიც გაცემულია საქართველოს მთავრობის და პარლამენტის მიმართ შესრულებული იყოს, რათა ამ შეუსრულებლობამ არ შექმნას წინაღობა მოლაპარაკებების გახსნის პროცესში. რაც შეეხება „ვეტინგის“ სისტემას, ყველა გადაწყვეტილება უნდა იყოს იმ საკანონმდებლო ჩარჩოში, რომელიც საქართველოში არსებობს, შესაბამისობაში უნდა მოდიოდეს საქართველოს კონსტიტუციასთან, ამიტომ, მაგალითებს რომელიც მოჰყავთ სხვა ქვეყანაში ჩატარებული „ვეტინგის“ შესახებ, ჩემი აზრით, მეტი არგუმენტაცია სჭირდება. შესასწავლია იქ მიღწეული შედეგები, რამდენად შეესაბამება ჩვენს კონსტიტუციას, რამდენად შესაძლებელია ასეთი ტიპის „ვეტინგის“ საქართველოში ჩატარება. თუ პოლიტიკური პარტიები შეთანხმდებიან ამ „ვეტინგის” ჩატარებაზე, მათ შორის ოპოზიცია და მმართველი პარტიაც რომ შეთანხმდეს, ეს გადაწყვეტილება საქართველოს კონსტიტუციასთან უნდა იყოს შესაბამისობაში“,- აღნიშნა იოსელიანმა.
