ომბუდსმენი: მეგრელიშვილის განცხადება ბავშვთა უფლებებზე დასაგმობი და საფრთხის შემცველია

სახალხო დამცველმა, ნინო ლომჯარიამ, გირჩის ლიდერის, ვახტანგ მეგრელიშვილის მიერ ბავშვების უფლებებსა და არასრულწლოვანთა მიმართ ძალადობაზე გაკეთებული განცხადებების გამო პარლამენტის თავმჯდომარეს მიმართა და მოითხოვა, რომ “საქართველოს პარლამენტის წევრის ეთიკის კოდექსის” საფუძველზე მისი განცხადებები განიხილონ.

ვახტანგ მეგრელიშვილი ტელეკომპანია ფორმულას გადაცემა ჩათის ანონსში ამბობს, რომ “თუ თემში ბავშვების ტაკოზე მიტყეპვა მისაღებია, ეს ჩემი საქმე არ არის” და “ბავშვებს უფლებები საერთოდ არ აქვთ”.

“ხაზგასასმელია, რომ საქართველოს პარლამენტის პირდაპირ ვალდებულებას წარმოადგენს ქვეყანის ტერიტორიაზე ბავშვის უფლებებისა და თავისუფლებების დაცვის უზრუნველყოფა. შესაბამისად, განსაკუთრებით საფრთხის შემცველი, შემაშფოთებელი და დასაგმობია მგავსი გამოსვლა საქართველოს პარლამენტის წევრისგან, რომელსაც საკუთარი მანდატის ფარგლებში აქვს ვალდებულება, ხელი შეუწყოს ქვეყანაში არაძალადობრივი და ბავშვის საუკეთესო ინტერესებზე მორგებული გარემოს შექმნას.

ვახტანგ მეგრელიშვილის მოქმედებები ასევე, ეწინააღმდეგება “საქართველოს პარლამენტის წევრის ეთიკის კოდექსით” პარლამენტარისთვის დადგენილ ვალდებულებას, დაიცვას საერთაშორისო და ადგილობრივი კანონმდებლობა, პატივი სცეს ადამიანის საყოველთაოდ აღიარებულ უფლებებსა და თავისუფლებებს, ხელი შეუწყოს ქვეყნის დემოკრატიის გაძლიერებასა და სამართლებრივი სახელმწიფოს ჩამოყალიბებას”, – წერია განცხადებაში.

სახალხო დამცველი განცხადებაში ასევე წერს, რომ გადაცემის ტელეკომპანია ფორმულას ეთერში განთავსებისას მნიშვნელოვანია, რომ ბავშვთა უფლებებისა და ბავშვის მიმართ ძალადობის საკითხები გაშუქდეს სიფრთხილითა და დაბალანსებულად წარმოჩენილი პოზიციების საფუძველზე.

“ამასთან, აუცილებელია, მაუწყებელმა გადაცემის მიმდინარეობისას დაიცვას გადაცემის მონაწილე არასრულწლოვანთა უფლებები” – წერს ნინო ლომჯარია.

რეკლამის ბანერი
წინა სტატიაში„ნამახვანჰესის” მოწინააღმდეგეები პოლიციას მოუწოდებენ, რომ რკინის ბარიკადებს მიღმა გადასვლის საშუალება მისცეს
შემდეგი სტატიასახელმწიფო დეპარტამენტის 2022 წლის ბიუჯეტის პროექტი საქართველოსთვის 88 მილიონის დოლარის დახმარების გამოყოფას ითვალისწინებს