ოკუპირებულ აფხაზეთში ელექტროენერგიაზე შეზღუდვები მოიხსნა. ამის შესახებ ინფორმაციას “ჩერნომორენერგოზე“ დაყრდნობით sputnik-abkhazia ავრცელებს. ენგურის წყალსაცავში წყლის მომატებამდე აფხაზეთს ელექტროენერგიით რუსეთის ფედერაცია მოამარაგებს.
„ეს საშუალებას მოგვცემს თავიდან ავიცილოთ მარტის თვეში ელექტროენერგიის სრული გათიშვა, ამასთანავე აფხაზეთი ელექტროენერგიით მთლიანი მოცულობით უზრუნველყოფილი იქნება წყლის მომატებამდე“- ნათქვამია ჩერნომორენერგოს განცხადებაში.
ენგურის წყალსაცავში წყლის დაკლების გამო, აფხაზეთის საოკუპაციო რეჟიმი მოსახლეობისათვის ელექტროენერგიის მარაოსებრ გათიშვას ახორციელებდა. ეს პროცესი 2016 წლის 25 იანვრიდან დაიწყო და 15 აპრილამდე უნდა გაგრძელებულიყო. წყალსაცავში წყლის დონე კრიტიკულ მინიმუმზეა დასული, თუ წყლის დონე 420 მეტრს ჩამოსცილდა, ელექტროსადგურის ტურბინები საერთოდ გამოირთვება.