37 წლის მაია ოთინაშვილი გორის რაიონის სოფელ ხურვალეთიდან რუსმა ოკუპანტებმა მოიტაცეს.
3 შვილის დედა, ქმართან ერთად, კაკლის ასაკრეფად იყო წასული იმ ნაკვეთში, რომელზეც ამ დრომდე მოსავალს იღებდა.
მაია ოთინაშვილს საკუთარ ბაღში ჩაუსაფრდნენ, თავს დაესხნენ და სპეციალური საშუალებების გამოყენებით მავთულხლართებზე გადაათრიეს.
როგორც ოჯახის წევრები ყვებიან, ქალი კიოდა, დახმარებას ითხოვდა, მაგრამ მისი დახმარება ვეღარ შეძლეს.
„ბაღში გავიდა კაკალზე, უნდა დაეკრიფა და ბიჭი მორბოდა იქიდან, რომ შენი რძალი დაიჭირეს და წაიყვანესო. ბაღში სარაიაა, იქ ყოფილან დამალულები, სახე დამალულები ჰქონდათ, ორნი იყვნენ, გაუყარეს “პადრუშკი”, გადაათრიეს სეტკაზე, ჩვენი ტერიტორიიდან, ჩვენი ბაღიდან, რომ მიჰყავდათ, ყვიროდა, მიშველეთო,“ – განაცხადა გატაცებულის ოჯახის წევრმა.
მომხდარის შესახებ ინფორმირებულია ყველა შესაბამისი სამსახური. ოჯახს ამ დრომდე არავინ დაკავშირებია.
გორის მუნიციპალიტეტის მერი, კონსტანტინე თავზარაშვილი, აღნიშნავს, რომ რუსი სამხედროების მხრიდან ქალების გატაცების მეორე შემთხვევაა.
