ნიკოლოზ ჩხეტიანი – ფონდი „ქართუ“ საქართველოში წარმოებულ 4 მლნ ერთჯერად სამედიცინო პირბადეს სახელმწიფოს სრულიად უსასყიდლოდ გადასცემს

ღეს, როდესაც მთელი ქვეყანა ებრძვის ახალ, უხილავ მტერს, მსოფლიო პანდემია Covid-19-ს, გვაქვს შესაძლებლობა, ჩვენი წვლილი შევიტანოთ ამ ბრძოლაში; ფონდმა „ქართუმ“ გადაწყვიტა, შეიძინოს და გადასცეს სახელმწიფოს საქართველოში წარმოებული 4 მილიონი სამედიცინო პირბადე, – ამის შესახებ ფონდი „ქართუს“ სამეთვალყურეო საბჭოს თავმჯდომარე ნიკოლოზ ჩხეტიანმა განაცხადა, რომელიც დღეს საერთაშორისო სტანდარტების ქართული პირბადეების წარმოების პროცესის დაწყებას საქართველოს პრემიერ-მინისტრ გიორგი გახარიასთან ერთად გაეცნო.

ნიკოლოზ ჩხეტიანის თქმით, შპს „რესპირატორი“ არის პირველი საწარმო საქართველოში, რომელმაც ამ ხაზის უმოკლეს დროში გამართვა და მწყობრში მოყვანა შეძლო.

„ფონდმა „ქართუმ“, როგორც მოგეხსენებათ, რამდენიმე დღის წინ 100 მილიონი ჩარიცხა კოვიდ-19-თან ბრძოლის ფონდში და ამასთან ერთად, ახორციელებს შემდგომ დახმარებას სახელმწიფოსთვის. ჩვენ ამ საწარმოსგან აღნიშნულ პირბადეებს შევიძენთ და გადავცემთ სახელმწიფოს, რომელიც მოიხმარს მას, როგორც ჯანდაცვის, ისე სასიცოცხლოდ აუცილებელ სხვა ობიექტებში. ვიმედოვნებთ, ამით აღმოიფხვრება ის დეფიციტი, რომელიც მთელს მსოფლიოშია და ბუნებრივია, საქართველოშიც გაჩნდა სამედიცინო დაცვის საშუალებებთან მიმართებაში“,- განაცხადა ნიკოლოზ ჩხეტიანმა.

ქართულმა კომპანია „რესპირატორმა“, სახელმწიფოს მხარდაჭერით, ახალი ციფრული ტექნოლოგიური დანადგარების საშუალებით, სპეციალური დანიშნულების, ერთჯერადი სამედიცინო პირბადეების ადგილობრივი წარმოება დაიწყო. კომპანია დღე-ღამეში 200 000-დან 250 000-მდე საერთაშორისო სტანდარტების სამშრიანი ნიღბის წარმოებას შეძლებს.

როგორც ნიკოლოზ ჩხეტიანმა აღნიშნა, ეს ყველაფერი შესაძლებელი გახდა სახელმწიფოსა და კერძო სექტორის თანამშრომლობის გზით.

„ეს პირბადეები სერტიფიცირებულია დაავადებათა კონტროლის ეროვნული ცენტრის მიერ, პასუხობს ყველა მსოფლიო სტანდარტს და ის დაეხმარება ჩვენს ექიმებს, მოსახლეობას, დაცულები იყვნენ ამ ეპიდემიის პირობებში. ეს ყველაფერი შესაძლებელი გახდა სახელმწიფოსა და კერძო სექტორის თანამშრომლობის გზით. მინდა, მადლობა გადავუხადო ყველა სახელმწიფო სტრუქტურას, რომელიც ჩართული იყო და გვეხმარებოდა ამ პროექტის განხორციელებაში. პირველ რიგში, მინდა აღვნიშნო ჯანდაცვის სამინისტრო, იუსტიციის სამინისტრო და რა თქმა უნდა, საგარეო საქმეთა სამინისტრო, რომელმაც ყველაფერი გააკეთა, რათა ნედლეული დროულად ჩამოსულიყო საქართველოში და შესაძლებელი გამხდარიყო წარმოების გაშვება,“- აღნიშნა ნიკოლოზ ჩხეტიანმა.

კომპანია „რესპირატორი“ დააარსა გუნდმა, რომელიც 2017 წლიდან სახელმწიფო პროგრამის – „აწარმოე საქართველოში“ მხარდაჭერით განვითარდა და აქვს ახალი მიმართულება – ციფრული ბეჭდვა UV ტექნოლოგიით, რომლის საშუალებითაც დღეს უკვე მაღალი ხარისხის პირბადეებს აწარმოებს.

banner
წინა სტატიაშიქართული პირბადეების მწარმოებელი კომპანიის დირექტორი – ლუგარის ლაბორატორიისაგან მივიღეთ ნებართვა, პირბადეები ყოველგვარ სტანდარტს აკმაყოფილებს
შემდეგი სტატიათბილისში 56-ვე მუნიციპალური სასაფლაო ხვალიდან ათი დღით დაიკეტება