ნიკა მელიას კონსტიტუციით მინიჭებული იმუნიტეტი ტყუილების საფუძველზე მოუხსნეს – ანა ნაცვლიშვილის სკანდალური განცხადება

ოპოზიციის ლიდერებს პოლიტიკური დაკვეთით დევნიან – სკანდალურ განცხადებას იურისტი ანა ნაცვლიშვილი აკეთებს. ირკვევა, რომ პარლამენტის დეპუტატ ნიკა მელიას კონსტიტუციით მინიჭებული იმუნიტეტი ტყუილების საფუძველზე მოუხსნეს.

ანა ნაცვლიშვილმა პროკურატურის მიერ პარლამენტში ნიკა მელიას იმუნიტეტის მოხსნის მიზნით წარდგენილი 4 ქეისი დეტალურად გაშიფრა და საგამოძიებო უწყება ტყუილში ამხილა.

პარლამენტში მიმდინარე მსჯელობისას იმუნიტეტის მოხსნა პროკურატურამ დაასაბუთა ევროპული სასამართლოს პრაქტიკიდან მოყვანილი 4 ქეისით და უმრავლესობის წევრებმა მათი კოლეგა პოლიტიკური რეპრესიებისთვის გაწირეს. თუმცა, ახლა გაირკვა, რომ ზემოთხსენებული 4 შემთხვევიდან ერთი საერთოდ ტყუილი იყო, დარჩენილი სამი ოდნავადაც არ ჰგავს მელიას საქმეს.

„კვლევით პროექტში ვმონაწილეობ და ამ დღეებში დამჭირდა წამეკითხა გენერალური პროკურორის მიერ პარლამენტისთვის მიწერილი ოფიციალური წერილი, რომლითაც გენერალური პროკურორი მიმართავს პარლამენტს, გასცეს ნიკანორ მელიას დაპატიმრების თანხმობა (20-21 ივნისის მოვლენებთან დაკავშირებით). თავი რომ დავანებოთ დოკუმენტის სამართლებრივი დასაბუთების ხარისხს (რომელიც პრობლემურია), გეტყვით მხოლოდ რამდენიმე ფაქტს: – დოკუმენტი მხოლოდ 4 გვერდისგან შედგება – იმის დასასაბუთებლად, რომ აუცილებელია მელიასთვის პატიმრობის შეფარდება, მოყვანილია ადამიანის უფლებათა ევროპული სასამართლოს პრაქტიკა. მითითებული საქმეებიდან ერთი უბრალოდ ბუნებაში არ არსებობს! (საქმეში მითითებულია კონრადი იტალიის წინააღმდეგ, ბევრი ძებნის შემდეგ, მივაგენი საქმეს, რომელსაც სინამდვილეში გულისხმობენ და რომლის სახელიც ასე ჟღერს: კონტრადა იტალიის წინააღმდეგ) – მითითებული ერთ-ერთი საქმე (ღავთაძე საქართველოს წინააღმდეგ) საერთოდ არ ეხება დოკუმენტში განსახილველ სამართლებრივ საკითხს -პატიმრობის შეფარდების სტანდარტებს (ეხება ციხეში სამედიცინო სერვისების არარსებობის გამო არაადამიანურ მოპყრობას) – დანარჩენ მითითებულ საქმეებში ფაქტობრივი გარემოებები იმდენად განსხვავდება მელიას საქმისგან, რომ მათი მითითება დოკუმენტში არარელევანტურია.

“ეს მხოლოდ წმინდად სამართლებრივ ნაწილზე მოგახსენეთ, უფრო დიდ სურათსაც ვხედავ ძალიან ნათლად, ამაზე მოგვიანებით. არ ჩამიხედავს სხვა გახმაურებული საქმეების დოკუმენტაციაში, მაგრამ ამის მერე როგორი დასაჯერებელია, რომ ხაზარაძე-ჯაფარიძის საქმეში, რომელიც სამართლებრივად გაცილებით მეტ კვალიფიკაციას მოითხოვს, წესრიგია? როგორი დასაჯერებელია ყველა ამ პერიოდში და ადრე დაწყებულ გამოძიებებში სხვა საქმეებზე, რომ სამართლებრივად სწორი ანალიზი და დასკვნებია გაკეთებული? როგორი დასაჯერებელია, რომ გვარამიასთვის წარდგენილი ბრალი დასაბუთებულია? ამის მერე აღარ მიკვირს ვატო წერეთლისთვის სასამართლოდან გაგზავნილი მესიჯის შინაარსი და ფორმა! დოკუმენტში, რომელიც პარლამენტის 150 დეპუტატს უნდა წაეკითხა და მიეღო პრეცედენტული გადაწყვეტილება, ასეთი ლაფსუსებია დაშვებული, ჯერ კომიტეტმა განიხილა, მერე პლენარულ სხდომაზე გავიდა – დეპუტატებს როგორ არ გრცხვენიათ, რომ ამაზე დაყრდნობით მიიღეთ გადაწყვეტილება? სტაჟიორი მაინც არ გყავდათ, რომ დაგევალებინათ თვალის გადავლება? კანონებსაც ასე იღებთ? სირცხვილია!“ – აღნიშნულია განცხადებაში.

მელიას ბრალი საქართველოს სისხლის სამართლის კოდექსის 225-ე მუხლის პირველი და მეორე ნაწილებით აქვს წარდგენილი, რაც ჯგუფური ძალადობის ხელმძღვანელობას, ასევე მასში მონაწილეობას გულისხმობს, რასაც თან ახლავს ძალადობა, სამართალდამცავი ორგანოს წარმომადგენელზე თავდასხმა და მისთვის წინააღმდეგობის გაწევას.

banner
წინა სტატიაში“ჩემი მინისტრი, რომელიც აქამდე მხოლოდ სამსახურში მინახავს, შემოვიდა და მომილოცა ალექსანდრეს დაბადება”
შემდეგი სტატიაგვარამიას, ოქრუაშვილის, “თიბისის” საქმეები პოლიტიკურად მოტივირებულია – ადამიანის უფლებებზე მომუშავე ორგანიზაციები