საფეხბურთო სკოლა ოლიმპის ირგვლივ განვითარებულ მოვლენებთან დაკავშირებით დღეს მერიაში შეხვედრა გაიმართა, რომელსაც ფეხბურთის ფედერაციის პრეზიდენტი და სპორტის მინისტრი დაესწრნენ.
ქალაქის მერის თქმით, ტერიტორია ყოფილი ხელისუფლების დროს გასხვისდა კერძო მესაკუთრეზე და განაშენიანების გეგმას ხელს აწერს თბილისის მერის ყოფილი მოადგილე, ირაკლი აბესაძე.
ამ განცხადების შემდეგ ნაციონალური მოძრაობის წარმომადგენლები სპორტული კომპლექსის ტერიტორიაზე მივიდნენ. ადგილზე ასევე იმყოფებიან ბავშვების მშობლები, მწვრთნელები და გულშემატკივრები.
მათი თქმით, დედაქალაქის მერს შეეძლო, გაეუქმებინა 2014 წელს გაცემული ნებართვა.
“დათო ნარმანია არის უსინდისო ადამიანი, რომელიც უნამუსოდ იტყუება. ის, რომ წინა ხელისუფლებამ გასცა ნებართვა, არ ნიშნავს, რომ ბავშვებს დაუნგრიო სტადიონი და დილით, მალულად, არაკაცურად შემოიყვანო ბულდოზერები და გადაუარო თავზე ბავშვებსაც,” – აცხადებს ნიკა მელია.
ადგილზე შეკრებილები აქციებს გეგმავენ და აცხადებენ, რომ მშენებლობის გაგრძელების უფლებას არავის მისცემენ.
“იქნება მუდმივი აქციები, დაწესდება მორიგეობა და გადაიზრდება სამოქალაქო პროტესტში,” – განმარტა ნიკა მელიამ.