თბილისში, ნავთლუღში მდებარე ყოფილი წისქვილკომბინატის შენობასთან მოქალაქეები და არქიტექტორები შეიკრიბნენ. ადგილობრივები და აქტივისტები ობიექტის დემონტაჟს ეწინააღმდეგებიან.
აქციის მონაწილეების განცხადებით, შენობა თბილისის ინდუსტრიული წარსულის მნიშვნელოვანი სიმბოლოა. არქიტექტორ ნატალია ნებიერიძის თქმით, შეკრების მთავარი მიზანი საბჭოთა პერიოდის ინდუსტრიული მემკვიდრეობის დაცვაა, რადგან მისი გაქრობა ქალაქის ისტორიის ნაწილის წაშლას ნიშნავს.
საინიციატივო ჯგუფის ინფორმაციით, ტერიტორია ამჟამად კერძო მფლობელობაშია და ადგილზე არსებული კომპლექსის დანგრევის შემდეგ 11 მრავალბინიანი საცხოვრებელი კორპუსის მშენებლობა იგეგმება. აქციის მონაწილეები მიიჩნევენ, რომ მსგავსი პროექტი ქალაქის ისტორიულ კვალს წაშლის და შექმნის მორიგ ჩაკეტილ სივრცეს, რომელიც მხოლოდ კერძო მესაკუთრის მოგებას ემსახურება.
