გამოცემა New Lines Magazine იუწყება, რომ NATO-ს მნიშვნელოვანი პროექტი, რომელიც 10 წლის წინ საქართველოში რუსულ ჰიბრიდულ ომთან საბრძოლველად შეიქმნა, დაიხურა. სტატიაში ნათქვამია, რომ ინფორმაციას დიდი ბრიტანეთის საგარეო საქმეთა სამინისტრო ადასტურებს.
სტატიის მიხედვით, ეს მას შემდეგ ხდება, რაც 10 თვის წინ, Meta-მ წაშალა ათობით ყალბი ანგარიში, რომელსაც საქართველოს მთავრობა ოპონენტებზე რუსული სტილის თავდასხმებისა და უკრაინაში პუტინის ომზე ანტიდასავლური დეზინფორმაციის გასავრცელებლად იყენებდა.
ნატოს მიერ მხარდაჭერილი სტრატეგიული კომუნიკაციების ინიციატივა დაარსდა ლონდონის მიერ 2015 წელს. სტატიაში ნათქვამია, რომ საქართველოს მთავრობის სტრატეგიული კომუნიკაციების დეპარტამენტმა – StratComs, რომელიც შეიქმნა ამ პროექტის ფარგლებში, წლების განმავლობაში მიიღო მნიშვნელოვანი დახმარება შეერთებული შტატებისა და დიდი ბრიტანეთისგან დაფინანსებული ტრენინგებისა და ტექნიკური რესურსების სახით, როგორც მოსკოვის გავლენის წინააღმდეგ ბრძოლის ფართო ძალისხმევის ნაწილი, რომელიც ათობით მილიონი დოლარი დაჯდა.
გამოცემა წერს, რომ პარასკევს, გაერთიანებული სამეფოს საგარეო საქმეთა სამინისტრომ არასაჯაროდ თქვა, რომ ინიციატივა მარტში დასრულდა.
“ჩვენ ახლა განვიხილავთ ჩვენს პოზიციას საქართველოსთან სამომავლო სტრატეგიული კომუნიკაციის შესახებ”, – ამბობს ლორდთა პალატის წევრი, თარიქ აჰმადი.
გამოცემა ამბობს, რომ გადაწყვეტილება მას შემდეგ მიიღეს, რაც “ოცნებამ” რუსული კანონი მიიღო, რასაც ფართო კრიტიკა მოჰყვა, როგორც ქვეყნის შიგნით ასევე დასავლელი პარტნიორების მხრიდან.
New Lines აშშ-ის საელჩოს მონაცემებზე დაყრდნობით წერს, რომ 2017-დან 2021 წლამდე 250-ზე მეტმა ადამიანმა გაიარა ტრენინგი, მათ შორის 57 პრემიერის ოფისიდან და სხვადასხვა სამინისტროებიდან იყო.
“საქართველოს სტრატეგიული კომუნიკაციების დეპარტამენტი, დიდი ბრიტანეთის ხელმძღვანელობით 2015 წელს შეიქმნა, როგორც NATO-ს ინიციატივა, რომლის მიზანია შავი ზღვის ქვეყნების გაძლიერება რუსული ჰიბრიდული ომის წინააღმდეგ. ამ პროექტის ფარგლებში, საქართველოს მთავრობის სამმართველოს თანამშრომლებმა გაიარეს ტრენინგი და ტექნიკური დახმარება ალიანსის ექსპერტებისგან. ასევე, დაესწრნენ და უმასპინძლეს კონფერენციებს და ანალიტიკურ დისკუსიებს დეზინფორმაციისა და პუტინისტური პროპაგანდის წინააღმდეგ ბრძოლის მეთოდებზე. თუმცა, დროთა განმავლობაში, როდესაც მთავრობამ დაიწყო თავისი დღევანდელ ანტიდასავლურ ტრაექტორიაზე სვლა, სტრატკომი გახდა სწორედ ისეთი საქმიანობის განმახორციელებელი, რომლისგანაც დასაცავად იყო შექმნილი. ქართული მონიტორების მრავალი მოხსენება აჩვენებს, თუ როგორ იყენებდა ის ტროლების ანგარიშებს პოლიტიკურ ოპონენტებზე რუსული სტილის სასტიკი თავდასხმების განსახორციელებლად. ასევე, ავრცელებდა ყალბ ახალ ამბებს და პროპაგანდისტულ ნარატივებს სწორედ იმ პარტნიორების შესახებ, რომლებიც მათ უჭერდნენ მხარს,” – ვკითხულობთ სტატიაში.
