ნათია თურნავა : ჩვენ ივლისშიც ძალიან ფრთხილად მოვეკიდებით საერთაშორისო ვიზიტორებსა და საერთაშორისო ტურისტებს

newsnews
ავტ.: newsnews ივნისი 25, 2020 12:55

ნათია თურნავა : ჩვენ ივლისშიც ძალიან ფრთხილად მოვეკიდებით საერთაშორისო ვიზიტორებსა და საერთაშორისო ტურისტებს

ჩვენ ივლისშიც ძალიან ფრთხილად მოვეკიდებით საერთაშორისო ვიზიტორებსა და საერთაშორისო ტურისტებს, – ამის შესახებ საქართველოს ეკონომიკისა და მდგრადი განვითარების მინისტრმა, ნათია თურნავამ მთავრობის სხდომის დასრულების შემდეგ განაცხადა.

როგორც ნათია თურნავამ აღნიშნა, სტუდენტებისა და ბიზნესვიზიტორებისთვის ქვეყანაში შემოსვლის ცალკე წესი შემუშავდა, რომელიც მალე გახდება საჯარო.

მისივე თქმით, ტურიზმთან დაკავშირებით საქართველოს მთავრობის მთავარი ამოცანაა, რომ ის მონაპოვარი გაძლიერდეს, რასაც ჰქვია ეპიდემიოლოგიური ვითარების მართვა და მოსახლეობის დაცვა.

„ჩვენ ივლისშიც ძალიან ფრთხილად მოვეკიდებით საერთაშორისო ვიზიტორებს, საერთაშორისო ტურისტებს. აქ იქნება რამდენიმე მიმართულება, ბიზნესვიზიტორებისთვის, სტუდენტებისთვის ცალკე წესი შემუშავდა და მალე გახდება საჯარო. იქნება ძალიან დაცული რეგულაციები, მაგრამ უფრო გამარტივებული შემოსვლა ჩვენს ბაზარზე. ასევე, ამ დღეებში ველოდებით, რა გადაწყვეტილებას მიიღებს ევროკავშირი, რომელმაც ჯერ მხოლოდ საკუთარ წევრ სახელმწიფოებს შორის გახსნა საზღვარი და ამ დღეებში მიიღებს გადაწყვეტილებას არაწევრ ქვეყნებზეც. რაც შეეხება ფრენებს, დიდი ალბათობით, მოგვიწევს რეგულარული ფრენების შეზღუდვის გადაწევა ივლისის ბოლომდე, თუმცა ჩარტერული, საკმაოდ რეგულარული ფრენები, დღესაც ხორციელდება, ივლისშიც განხორციელდება. ჩვენ ამას გავაგრძელებთ ჯანდაცვის სამინისტროსთან და საგარეო საქმეთა სამინისტროსთან შეთანხმებით. რეგულარული ფრენების აღდგენა, პირველ რიგში, დამოკიდებულია დანარჩენი მსოფლიოს ეპიდემიოლოგიურ ვითარებაზე. ჩვენ ყველაზე მეტად გვინდა, რომ აღდგეს რეგულარული ფრენები. დღეს ის ვითარებაა, როცა პირველი არის ჯანმრთელობა. ჩვენ ალბათ გადავავადებთ ივლისის ბოლომდე რეგულარული ფრენების გახსნას, სრული მასშტაბით. არ იქნებოდა პასუხისმგებლიანი, რომ გაგვეხსნა ფრენები“, – განაცხადა ნათია თურნავამ.

newsnews
ავტ.: newsnews ივნისი 25, 2020 12:55

Google სტატისტიკა


4,198
ვიზიტორი
დღეში
Powered By Google Analytics