ნარკოდანაშაულისთვის დაკავებული ბერ-მონაზონისთვის თავდებში დადგომას ზუგდიდისა და ცაიშის ეპარქიაში არ ადასტურებენ.
როგორც ეპარქიაში ამბობენ, მამა სვიმონ ქავთარაძე ზუგდიდში ეპარქიაში წლების განმავლობაში აღარ მსახურობდა და ათონის წმინდა მთაზე მოღვაწეობდა.
სასულიერო პირები აღნიშნულ ფაქტთან დაკავშირებით, ოფიციალური განცხადების გავრცელებას გეგმავენ.
“ჩვენ ერთად ვსწავლობდით თბილისის სასულიერო სემინარიაში, შემდგომ ის გაემგზავრა ათონის წმინდა მთაზე, სადაც აღიკვეცა ბერად. ამჟამად, ის ჩვენს ეპარქიაში არ მსახურობს. რამდენიმე წლის წინ დატოვა ზუგდიდისა და ცაიშის ეპარქია.
გამოძიება დაადგენს ამ ყველაფერს, მაგრამ როგორ წარმოგიდგენიათ სასულიერო პირი ასეთ მდგომარეობაში რანაირად შეიძლება აღმოჩნდეს. ყოვლად წარმოუდგენელია. მას ვიცნობ ბავშვობიდან და გვქონდა მთელი ამ წლების განმავლობაში ურთიერთობა, ეს ჩვენთვისაც ძალიან მოულოდნელი ფაქტი იყო,“ – აცხადებს ეპარქიის მდივანი დიმიტრი ვეკუა.
ცნობისთვის, “თაიმერმა” მღვდლის დაკავების შესახებ ინფორმაცია ექსკლუზიურად გუშინ წინ გაავრცელა. ინფორმაცია თავდაპირველად შინაგან საქმეთა სამინისტრომ კატეგორიულად უარყო. გამოძიება სასულიერო პირს დიდი ოდენობით ნარკოტიკული საშუალების ქონას ედავება.
