უკრაინელმა მფრინავმა ნადეჟდა სავჩენკომ ორი დღის წინ ოფიციალურად გამოაცხადა მშრალი შიმშილობა. შესაბამისი განცხადება მისმა ადვოკატმა გამოაქვეყნა.
“მე, სავჩენკო ნადეჟდა ვიქტორის ასული, უკრაინის მოქალაქე, მშრალ შიმშილობას ვაცხადებ 04.03.2016 -დან ჩემი უკრაინაში მკვდრად ან ცოცხლად დაბრუნებამდე” – წერია სავშენკოს მიერ დაწერილ წერილში.
მისი თქმით, მისი პროტესტი მიმართულია რუსეთის მთავრობის, კრემლის და სპეცსამსახურების, გამოძიებისა და პროკურატურის წინააღმდეგ, რომლებიც “საკუთარ დანაშაულს ფარავენ” – ნათქვამია წერილში.
ამასთანავე, სავჩენკომ კატეგორიული უარი განაცხადა რაიმე სახის ანალიზების გაკეთებაზე, ან ციხის ადმინისტრაციის მიერ შემშილობის ხელისშეშლის მცდელობაზე – “ნებისმიერი ფიზიკური ძალის გამოყენება შეფასდება როგორც წამება და გავუწევ წინააღმდეგობას” – განაცხადა სავჩენკომ. მისი თქმით, თუკი ის 9 მარტამდე ცოცხალი იქნება, მისი სურვილია სასამართლოზე მისი მიყვანა.
“ჩემი სიკვდილის შემთხვევაში კატეგორიულ უარს ვამბობ ჩემი ცხედრის რუსეთში გახსნაზე, მოვითხოვ, ის გადაეცეს დედას და დას. ჩემი გადაწყვეტილება არ შეიცვლება” – წერს სავჩენკო ადვოკატისადმი მიწერილ წერილში.
უკრაინის გენერალურმა კონსულმა როსტოვში განაცხადა, რომ უკრაინა სავჩენკოსთვის სამ ექიმს აგზავნის, მაგრამ მათი ციხეში შესვლას პროცედურების გავლა სჭირდება, რაც შეიძლება გაიწელოს.