მე-8 პენიტენციურ დაწესებულებაში ჟოლოსა და პომიდორ „ჩერის“ მოსავლის აღება გრძელდება. ამის შესახებ ინფორმაციას იუსტიციის სამინისტრო ავრცელებს.
მათივე ცნობით, მსჯავრდებულები დღეს სამი სახეობის ჟოლოს, ასევე, წითელ და ყვითელ პომიდორ „ჩერის“ კრეფენ.
„პენიტენციურ დაწესებულებაში სასოფლო-სამეურნეო პროექტის მიმდინარეობის სამწლიან პერიოდში წლევანდელი მოსავალი საუკეთესოა, რაც მსჯავრდებულთა შემოსავალზეც აისახება, ჟოლოსა და პომიდვრის გაყიდვით მიღებული თანხა მათ ხელფასის სახით დაერიცხებათ. პროდუქტის რეალიზაციას იუსტიციის სამინისტროს მსჯავრდებულთა პროფესიული მომზადებისა და გადამზადების ცენტრი რამდენიმე ობიექტში მოახდენს. სასოფლო-სამეურნეო სამუშაოებში მონაწილეობა მსჯავრდებულების რეაბილიტაცია-რესოციალიზაციის პროცესის მნიშვნელოვანი კომპონენტია, ფიზიკური აქტივობა კი მათ ჯანმრთელობის შენარჩუნებაში ეხმარება. ამასთან, მსჯავრდებულები სამეურნეო საქმიანობის უნარ-ჩვევებსაც იძენენ.
მოსავლის მოყვანის პროცესში გლდანის პენიტენციური დაწესებულების მსჯავრდებულები 2019 წლიდან მონაწილეობენ. თავდაპირველად მათ მცირე ტერიტორიაზე მხოლოდ ჟოლო მოჰყავდათ, წელს კი სასოფლო-სამეურნეო სამუშაოები უკვე 9 000 კვადრატული მეტრზე მიმდინარეობს და მსჯავრდებულებმა 1500 კგ. ჟოლო, 2500 კგ. წითელი და ყვითელი პომიდორი „ჩერი“, 2000 კგ. საზამთრო, 1000 კგ. გოგრა, 1000 კგ. ბულგარული წიწაკა, ბრიუსელის კომბოსტო და მწვანილი, ჯამში, 8 ტონაზე მეტი ხილი და ბოსტნეული მოიყვანეს. პროგრამის მხარდამჭერები არიან საფრანგეთ-საქართველოს სავაჭრო და სამრეწველო პალატა, საქართველოს სოფლის მეურნეობის სამინისტრო და სოფლის მეურნეობის სამეცნიერო-კვლევითი ცენტრი“, – ნათქვამია ინფორმაციაში.
