მწვავე დებატები პარლამენტში ოპოზიციასა და ,,პოზიციას” შორის-“ჩართეთ ახალი ამბები და უყურეთ, რა ხდება ზუგდიდში”

region
: region მაისი 14, 2019 15:49

მწვავე დებატები პარლამენტში ოპოზიციასა და ,,პოზიციას” შორის-“ჩართეთ ახალი ამბები და უყურეთ, რა ხდება ზუგდიდში”

პარლამენტში მწვავე დებატები მიმდინარეობს. ოპოზიცია ამომრჩევლის მოსყიდვის ტოტალურ ტენდენციაზე საუბრობს და დამნაშავეების დასჯას მოითხოვს.

ხელისუფლების ოპონენტების უკმაყოფილება პარლამენტის თავმჯდომარის პირველი მოადგილის განცხადებას მოჰყვა, რომელმაც აღნიშნა, რომ საარჩევნო გარემო განსაკუთრებული დაძაბულობის გარეშე და მშვიდ ვითარებაში მიმდინარეობს. თამარ ჩუგოშვილმა დეზინფორმაციის გავრცელებაზე გაამახვილა ყურადღება.

„საარჩევნო გარემო მიმდინარეობს განსაკუთრებული დაძაბულობის გარეშე, მშვიდ ვითარებაში… სამწუხაროდ, იყო არაერთი შემთხვევა, როდესაც დეზინფორმაციული ელემენტები იქნა შეტანილი საარჩევნო პროცესში. სეთი ელემენტები საარჩევო გარემოს საკმაოდ აფუჭებს,“ – განაცხადა თამარ ჩუგოშვილმა.

ოპოზიციის წევრებმა პარლამენტის ვიცე-სპიკერს სთხოვეს, რომ დაინტერესდეს ზუგდიდში განვითარებული მოვლენებით, სადაც ოპოზიციის წარმომადგენლებს თავს დაესხნენ.

„ქალბატონო თამარ, ჩართეთ ახალი ამბები, თუ შეიძლება და უყურეთ, რა ხდება ზუგდიდში. იყო თავდასხმის მცდელობა ჩვენს კანდიდატზე, ქალბატონ სანდრა რულოვსზე, განხორციელდა თავდასხმა ჩვენი პოლიტსაბჭოს წევრზე, ბატონ ზაალ სამადაშვილზე და განხორციელდა თავდასხმა თბილისის საკრებულოს წევრზე, ბატონ ნიკა ვაჩეიშვილზე. ასევე, ნაცემია და თავდასხმის მსხვერპლია ტელეკომპანია „ოდიშის“ ფოტოგრაფი, გადამღები და ჟურნალისტი. მაინტერესებს, ეს არის თქვენი აზრით, ცივილიზებული, ნორმალური, დემოკრატიული ქვეყნის საარჩევნო გარემო? მინდა, მივმართო ამომრჩევლებს, აიღეთ ის საჩუქრები, რომელსაც დღეს მათხოვრებივით გიგდებთ ბიძინა ივანიშვილი არჩევნების წინ, მაგრამ ხმა „ქართულ ოცნებას“ აღარასოდეს აღარ მისცეთ,“ – განაცხადა „ნაციონალური მოძრაობის“ წევრმა, სალომე სამადაშვილმა.

ოპოზიცია დაინტერესდა მმართველი გუნდის აზრით, შეესაბამება თუ არა ძალადობითა და დაშინებით წარმართული წინასაარჩევნო გარემო დემოკრატიულ ქვეყანას.

„ქალბატონი თამარ ჩუგოშვილი საუბრობდა მშვიდ გარემოზე წინასაარჩევნოდ და როგორც ჩანს, მან არ იცის ბოლო პერიოდში, ბოლო რამდენიმე საათში გავრცელებული, თუნდაც, უახლესს ვამბობ, რამდენიმე კადრი, რომელიც ზუგდიდიდან გავრცელდა, თავ-პირს როგორ ამტვრევენ იქ ოპოზიციის წარმომადგენლებს. მაინცდამაინც ახალქალაქისნაირი სისხლისღვრა უნდა მოხდეს, რომ რამე რეაგირება მოხდეს ამაზე?“ – განაცხადა „ევროპული საქართველოს“ წევრმა, სერგი კაპანაძემ.

ოპოზიციამ მმართველ გუნდს მოუწოდა, ინსტრუქციებს, რომ საარჩევნო გარემო მშვიდად მიმდინარეობს, ნუ დაუჯერებენ და რეალობას გაუსწორონ თვალი.

„მინდა, მივმართო „ქართული ოცნებიდან“ ჩვენს კოლეგებს, გვერდზე გადადეთ ის ინსტრუქციები, მესიჯბოქსები თუ მესიჯები, რაც მოგდით, რომ უნდა თქვათ, რომ არჩევნები მშვიდ გარემოში ვითარდება და რეალობას მართლაც შეხედეთ თვალებში და დაინახეთ, რომ იმ ადგილას, სადაც წინა არჩევნების შედეგად ადამიანი გარდაიცვალა ინსულტით, ადამიანი, რომელიც იძახდა, რომ ჩემზე არის პოლიტიკური ზეწოლა, გარდაიცვალა ინსულტით და ამის მერე არაფერი გამოიძიეთ, ამ ზონდერების მივარდნას ადამიანებთან, ინსტრუქციებს, რომ ადამიანის გატაცებაც შეიძლება, თურმე, მოსყიდვა, ყველანაირი გზით ზეწოლა და რისთვის, იმისთვის, რომ ოღონდ თქვენ შეინარჩუნოთ სკამები?“ – განაცხადა „ევროპული საქართველოს“ წევრმა, ელენე ხოშტარიამ.

region
: region მაისი 14, 2019 15:49

გამოკითხვა

ამჟამად არცერთი გამოკითხვა არ მიმდინარეობს.

Google სტატისტიკა


4,551
ვიზიტორი
დღეში
Powered By Google Analytics