ბაქოს სამხედრო სასამართლომ აზერბაიჯანის სისხლის სამართლის კოდექსის სხვადასხვა მუხლით დამნაშავედ ცნო მთიანი ყარაბაღის თვითგამოცხადებული რესპუბლიკის ყოფილი “მთავრობის მეთაური” რუბენ ვარდანიანი. მას 20 – წლიანი პატიმრობა მიესაჯა. ბრალდების მხარე ვარდანიანისთვის სამუდამო პატიმრობას ითხოვდა.
აზერბაიჯანი მას ომის დანაშაულებსა და ტერორიზმის დაფინანსებაში სდებდა ბრალს.
აზერბაიჯანელმა მესაზღვრეებმა რუბენ ვარდანიანი 2023 წლის 27 სექტემბერს “ლაჩინის” სასაზღვრო გამშვებ პუნქტზე, მთიანი ყარაბაღის დატოვების მცდელობისას დააკავეს.
ვარდანიანი სომხური წარმოშობის მილიარდერი და მოსკოვის ერთ-ერთი პირველი საინვესტიციო ბანკის დამფუძნებელია. ვარდანიანმა 2022 წელს რუსეთის მოქალაქეობაზე უარი თქვა და მთიან ყარაბაღში გადავიდა, სადაც 2023 წლის თებერვლამდე ე.წ. მთავრობის მეთაურის თანამდებობას იკავებდა.
