მსოფლიო ბანმა პაატა ბურჭულაძემ პატიმრობაში მყოფ თანამოაზრეებს საპროცესო შეთანხმების გაფორმებისკენ მოუწოდა. მისი განცხადებით, მიმდინარე ეტაპზე ბრძოლის გასაგრძელებლად ყველაზე მნიშვნელოვანი თავისუფლებაზე ყოფნაა. ამასთან, ბურჭულაძე აცხადებს, რომ თავად საპატიმროს მანამდე არ დატოვებს, ვიდრე ბოლო პოლიტპატიმარიც არ გათავისუფლდება.
ბურჭულაძის ინიციატივასთან დაკავშირებით მსჯავრდებულთა პოზიციები განსხვავებულია. „სასახლის ღობის საქმეზე“ მსჯავრდებულთა ნაწილი აცხადებს, რომ საპროცესო შეთანხმებაზე არ წავა, რადგან თავს დამნაშავედ არ მიიჩნევს და დანაშაულის აღიარებას არ აპირებს.
მეორე ნაწილი კი საპროცესო შეთანხმების შესაძლებლობას განიხილავს. განსაკუთრებით ისინი, ვისაც ჯანმრთელობის პრობლემები აქვს და ციხიდან გათავისუფლებას ამ გზითაც არ გამორიცხავს.
შესაბამისად, პაატა ბურჭულაძის მოწოდებას ყველა მსჯავრდებული ერთნაირად არ აფასებს — ნაწილი მის ინიციატივას მხარს უჭერს და საპროცესო შეთანხმების განხილვას მზად არის, ხოლო ნაწილი კატეგორიულად უარს აცხადებს და სამართლებრივი ბრძოლის გაგრძელებას ამჯობინებს.
