თბილისში, ხორავას ქუჩაზე მომხდარი მკვლელობის, საგამოძიებო კომისიის წევრები დღეს რამდენიმე პირს გამოკითხავენ.
კანონმდებლები ინფორმაციას იმ ორი პირისგან მიიღებენ, რომელთაც ბრალი დანაშაულის დაფარვაში ედებათ.
შს სამინისტროს ინფორმაციით, სწორედ მათ შეუწყვეს ხელი ერთ-ერთი არასრულწლოვანის მიმალვას.
„გამოიკითხება ორი პიროვნება, რომლებიც დაკავებული არიან დანაშაულის დაფარვის ფაქტზე. მათ რა თქმა უნდა შეიძლება ჰქონდეთ ინფორმაცია მნიშვნელოვან გარემოებებზე, როგორც დაფარვის ეპიზოდზე, ასევე ხორავას 4 ნომერში მომხდარ ტრაგიკულ ეპიზოდზე, იქედან გამომდინარე, რომ სწორედ მათთან იყვნენ არასრულწლოვნები ჩხუბის შემდგომ. შესაძლებელია მათ მოსმენილი ჰქონდეთ რეალურად მომხდარის შესახებ,“-განაცხადა ირაკლი აბესაძემ.
კომისიის მუშაობის ძირითადი, გამოკითხვის ეტაპი თითქმის უკვე დასრულებულია. მოწმეთა ჩვენებების გაანალიზების შემდეგ კანონმდებლები დასკვნას შეიმუშავებენ, რომელიც პარლამენტის ბიუროს სექტემბრის დასაწყისში წარედგინება.
