საქართველოში ინსულინის ხარისხთან და შენახვის პირობებთან დაკავშირებით სოციალურ ქსელში გავრცელებულმა მოქალაქის განცხადებამ საზოგადოებაში კითხვები გააჩინა. განცხადება ეხება ინსულინ დეგლუდეკს, რომელიც სავაჭრო სახელწოდებით Tresiba®-ით არის ცნობილი.
გავრცელებული ინფორმაციის თანახმად, მიმდინარე წლის ივნისის დასაწყისში დანიური კომპანია Novo Nordisk-ის მიერ წარმოებული Tresiba®-ს ერთ-ერთი პარტია, რომელიც საქართველოს ბაზრისთვის იყო განკუთვნილი, ტრანსპორტირებისას შესაძლოა არასათანადო პირობებში აღმოჩნდა. განცხადების ავტორის მტკიცებით, აღნიშნული პარტია მწარმოებელმა კომპანიამ ვარგისიანობის შესაფასებლად უკან გაიწვია.
ამავე განცხადებაში ნათქვამია, რომ მოგვიანებით აფთიაქებში კვლავ გამოჩნდა Tresiba®-ს ინსულინი, რომლის გამოყენების შემდეგ, ავტორის თქმით, ზოგიერთ პაციენტს სისხლში გლუკოზის უჩვეულოდ მაღალი მაჩვენებლები აღენიშნა. მოქალაქე ასევე სვამს კითხვას, რამდენად საფუძვლიანად შემოწმდა აღნიშნული პრეპარატის ხარისხი და რამდენად ეფექტიანად ხორციელდება საქართველოში მედიკამენტების ხარისხის სახელმწიფო კონტროლი.
ამ ეტაპზე აღნიშნული ინფორმაცია უნდა შეფასდეს როგორც მოქალაქის განცხადება და არა როგორც დადასტურებული ფაქტი. საჯაროდ ხელმისაწვდომი მტკიცებულება, რომელიც დაადასტურებდა, რომ Tresiba®-ს რომელიმე კონკრეტული პარტია უხარისხო იყო ან პაციენტებში გლუკოზის მატება უშუალოდ ამ პრეპარატის გამოყენებას უკავშირდებოდა, არ არსებობს.
სპეციალისტების შეფასებით, ინსულინი სიცოცხლისთვის აუცილებელი ბიოლოგიური მედიკამენტია, რომლის ეფექტურობა მნიშვნელოვნად არის დამოკიდებული შენახვისა და ტრანსპორტირების პირობების დაცვაზე. სწორედ ამიტომ, ნებისმიერი მსგავსი სიგნალი საჭიროებს სწრაფ, დამოუკიდებელ და გამჭვირვალე შეფასებას ფარმაკოზედამხედველობის მოქმედი პროცედურების ფარგლებში.
ექსპერტები აღნიშნავენ, რომ ასეთ შემთხვევებში მნიშვნელოვანია არა წინასწარი დასკვნების გამოტანა, არამედ ყველა გარემოების საფუძვლიანი შესწავლა. ეს მოიცავს პრეპარატის პარტიის იდენტიფიცირებას, ტრანსპორტირებისა და შენახვის პირობების გადამოწმებას, საჭიროების შემთხვევაში ლაბორატორიული კვლევების ჩატარებას და მიღებული შედეგების საზოგადოებისათვის გამჭვირვალედ მიწოდებას.
ჯანდაცვის სფეროს სპეციალისტების თქმით, საკითხი მხოლოდ ერთი პრეპარატით არ შემოიფარგლება. საუბარია იმაზე, რამდენად ეფექტიანად არის დაცული ტემპერატურისადმი მგრძნობიარე მედიკამენტები იმპორტიდან საბოლოო მომხმარებლამდე.
შგახსენებთ რომ ინსულინი ტრეიბას ერთი კოლოფი ავერსის ავთიაქში 280 ლარი ღირს. პრეპარატი საქართველოში კომპანია „ავერსის“ დაკვეთით შემოვიდა.
