უკრაინის თავდაცვის მინისტრმა ოლექსი რეზნიკოვმა CNN-თან ინტერვიუში განაცხადა, რომ მომავალ ზაფხულს უკრაინა ომში გაიმარჯვებს და ნატოში 2024 წლის ივლისში გაწევრიანდება.
მედიასთან ინტერვიუში რეზნიკოვი აღნიშნავს, რომ მომავალი ივლისის სამიტი ვაშინგტონში, ალიანსის 75 წლისთავი იქნება და ამბობს: „ვინ იცის, იქნებ ეს იყოს ძალიან მნიშვნელოვანი დღე უკრაინისთვის, ეს მხოლოდ ჩემი პროგნოზია“.
რეზნიკოვმა აღიარა, რომ უკრაინა ალიანსში გაწევრიანებას მხოლოდ ომის დასრულების შემდეგ შეძლებს. ამასთან მან მე-5 მუხლზე მიუთითა და თქვა: „ჩვენ არ გვაქვს არჩევანი ერთსულოვანი კენჭისყრისთვის“, სანამ კონფლიქტი გრძელდება. აქვე აღნიშნა, რომ უკრაინას ალიანსში გამარტივებული მიღების პროცესი ექნება და ამასობაში გააგრძელებს მუშაობას საჭირო რეფორმებზე.
კითხვაზე, ფიქრობს თუ არა, რომ ომი მომავალ ზაფხულს დასრულდება, მან სწრაფად უპასუხა: „დიახ. ჩვენ გავიმარჯვებთ ამ ომში“.
უკრაინის თავდაცვის მინისტრმა ხაზგასმით აღნიშნა, რომ უკრაინის ალიანსში მიღების სარგებელი მხოლოდ რუსეთის წინააღმდეგ ბრძოლის გათვალისწინებით გაიზარდა.
„გამარჯვების შემდეგ, ამის შემდეგ, ეს იქნება ნატოს ინტერესებში, რადგან ჩვენ გავხდებით ნატოს აღმოსავლური ფარი, ან ევროპის ფარი აღმოსავლეთში“, – თქვა მან.
უკრაინამ მოიპოვა „ნამდვილი საბრძოლო გამოცდილება – როგორ შეაკავოს რუსები, დაამარცხონ ისინი, დაამარცხონ ისინი ნატოს სტანდარტების შეიარაღების გამოყენებით“, – დასძინა რეზნიკოვმა.
