ხორავას ქუჩაზე მომხდარი მკვლელობის საქმის განხილვა დღეს მოწმეების დაკითხვით გაგრძელდება. მოკლული ლევან დადუნაშვილის ოჯახის ადვოკატის, ხათუნა მაღლაკელიძის განცხადებით, მოკლული მოზარდების მეგობრები გამოძიებასთან არ თანამშრომლობენ.
გარდა ამისა, დადუნაშვილების ოჯახის ინტერესების დამცველი ფიქრობს, რომ ზოგიერთი მედიასაშუალება საზოგადოების შეცდომაში შეყვანას ცდილობს, კერძოდ, იქმნება შთაბეჭდილება, რომ გამოძიება არასწორად მიმდინარეობს.
„ეს ეხება, როგორც მოწმეთა ჩვენებებს, ისე ექსპერტის დასკვნებს. საქმეში რომ ყოფილიყო ერთი გარდაცვლილი, წარმოდგენილი ყოფილიყო ერთი დანა და ჭრილობაც ერთი ჰქონოდა მიყენებული ამ გარდაცვლილს, ექსპერტი იმავე შინაარსის დასკვნას დაწერდა, რაც დღევანდელი მდგომარეობით არის წარმოდგენილი.
მოგეხსენებათ, გაიჟღერა ინფორმაციამ, რომ ექსპერტმა ვერ განახორციელა იდენტიფიცირება, რომელი ჭრილობა რომელი დანით არის მიყენებული, ამიტომ ვამბობ, საზოგადოების შეგნებულად შეცდომაში შეყვანა მიმდინარეობს. იურისტებმა, რომლებიც ამგვარ შინაარსის განცხადებებს აკეთებენ, იციან, რომ სხვა საქმეებშიც, შედარებითი კვლევის საფუძველზე მომზადებულ დასკვნებს ექსპერტები ამგვარი ინტერპრეტაციით გასცემენ. გვირეკავენ როგორც ნაცნობები, ასევე უცნობები და გვეკითხებიან, კი მაგრამ ეს დანაშაული გაუხსნელი რჩება? – ანუ ისეთი შთაბეჭდილება რჩებათ, თითქოს, პირებს, რომლებიც ბრალდებულებად არიან წარდგენილი, დანაშაული არ ჩაუდენიათ და თურმე მათ რაღაც არასწორი გამოძიების საფუძველზე წაუყენეს არასწორი ბრალდება“, – განაცხადა დადუნაშვილების ოჯახის ადვოკატმა.
