“მივდივარ რუსთავი 2”-დან, რადგან ვეღარ ვხედავ ჩემს თავს ამ არხზე – წერს ტელეკომპანია “რუსთავი2-ის” ჟურნალისტი თეონა ცხომელიძე Facebook-ზე”.
ცხომელიძის თქმით, არხს ტოვებს, რადგან სარედაქციო პოლიტიკას, რომელიც “ბოლო პერიოდში მნიშვნელოვნად შეიცვალა მისთვის მიუღებელია”.
“როცა ამ პროფესიაში ხარ, მართალი უნდა იყო სამთან: მაყურებელთან, შენს რესპონდენტებთან და საკუთარ თავთან. დანარჩენი – მეგობრობა, პირადი ურთერთობები, პოლიტიკოსები (როცა ისინი რესპონდენტები არ არიან) მენეჯმენტიც კი ან უმუშევრად დარჩენით გამოწვეული პრობლემები მეორეხარისხოვანია.
მივდივარ “რუსთავი 2”-დან, რადგან ვეღარ ვხედავ ჩემს თავს ამ არხზე.
არ ვეთანხმები სარედაქციო პოლიტიკას, რომელიც ბოლო პერიოდში მნიშვნელოვნად შეიცვალა, რომელიც მიუღებელია ჩემთვის და რომელიც მაყურებლისთვისაც საგრძნობია. 17 წელი ცოტა არაა პროფესიაში, კარგად რომ გაარჩიო სწორი და არასწორი.
მივდივარ სახლში, წარმატებებს ვუსურვებ კოლეგებს და მადლობა ყველას, ვინც აქამდე მომცა შესაძლებლობა როგორც წამყვანს, რეპორტიორსა და პროდიუსერს ისე გამეკეთებინა ჩემი საქმე, როგორც სწორად მიმაჩნდა – მომეყოლა ყველაფერი და ზუსტად ისე როგორც იყო.”,- წერს ჟურნალისტი.
