“კრიზისებს არა აქვს სახელმწიფო საზღვრები” – ამ მოწოდებით მიუნხენში 52-ე უსაფრთხოების კონფერენცია გაიხსნა, რომელშიც მსოფლიო ლიდერებთან ერთად, პრემიერ-მინისტრი გიორგი კვირიკაშვილი მონაწილეობს.
მისასალმებელი სიტყვა კონფერენციის თავმჯდომარე ვოლფგანგ იშინგერმა წარმოთქვა და მონაწილეებს სტუმრობისთვის მადლობა გადაუხადა.
პრემიერის პრესსამსახურის ინფორმაციით, მიუნხენის უსაფრთხოების კონფერენციის ოფიციალურ მოხსენებაში ნათქვამია, რომ 2016 წელი დაიწყო გაზრდილი რისკებით, მათ შორის სამხედრო დაპირისპირებებითა და ფუნდამენტური ტრანსფორმაციებით. შესაბამისად, 52- ე უსაფრთხოების კონფერენციის დღის წესრიგის მთავარი საკითხებია: ევროპის თავდაცვის სისტემის კრიზისი, სირიის ომი, ტერორისტული დაჯგუფებების საქმიანობა და დევნილთა პრობლემები.
მიუნხენში, საერთაშორისო ფორუმში მონაწილეობის მისაღებად, 30-მდე ქვეყნის მეთაური, 60-ზე მეტი საგარეო საქმეთა მინისტრი და თავდაცვის მინისტრი, ასობით წამყვანი პოლიტიკოსი, ექსპერტი და ჟურნალისტი იმყოფება.
მიუნხენის კონფერენცია, როგორც ნატო-ს წევრი ქვეყნების “თავდაცვის უწყებათა წარმომადგენლების სხდომა”, 1962 წელს დაარსდა და იგი ამჟამად გლობალურ საერთაშორისო ფორუმს წარმოადგენს.
