მიშას ენმ-დან ჩამოშორება, პარტიის დეგრადაციას გამოიწვევს – თეა თუთბერიძე გიგი უგულავას პასუხობს

“თავისუფლებისა და დემოკრატიის განვითარების ინსტიტუტის” ხელმძღვანელი, თეა თუთბერიძე, პატიმრობაში მყოფი, თბილისის ყოფილი მერის, გიგი უგულავას განცხადებას ეხმაურება.

“ფეისბუქის” პირად გვერდზე თეა თუთბერიძე წერს, რომ მიხეილ სააკაშვილის “ერთიანი ნაციონალური მოძრაობიდან” ჩამოშორება, ამ პარტიის საბოლოო დეგრადაციას გამოიწვევს.

“მიუხედავად იმისა, რომ გიგი ძალიან მიყვარს, ეს ყველაფერი იმისი გაგრძელებაა, რასაც სამწუხაროდ 2012 წელს გადააყოლეს სააკაშვილის ხელისუფლება და ქვეყანაც, სამწუხაროდ – მიშას მოშორება, ჩამოშორებას.

მიუხედავად იმისა, რომ სააკაშვილს თავის დროზედაც ბევრ რამეში არ ვეთანხმებოდი, ჰქონდა შეცდომები და ვიღაცეებისგან განსხვავებით დღეს რომ აჭყლოპინდნენ, ამას ღიად ვამბობდი მაშინ და იმასაც, რასაც მიმაჩნდა რომ სწორს აკეთებდა, ვთვლი რომ მიშას ჩამოშორება ენმ-დან გამოიწვევს ამ პარტიის საბოლოო დეგრადაციას.

ყველამ კარგად ვიცით, რომ ამ პარტიას ამომრჩეველი არ აძლევს ხმას გიგას, გიგის, ელენე ხოშტარიას, ოთო კახიძის და ა.შ. ბევრი ჩემთვის საპატივცემულო ადამიანის გამო. ამ პარტიის ამომრჩევლის სულ მცირე 98% ხმას აძლევს სწორედ მიშას და არა სხვებს ამ პარტიაში. ამას ან ვერ ხვდებიან ზოგიერთები (რაშიდაც ეჭვი მეპარება რომ ასე იყოს), ან ხვდებიან და შეგნებულად მიდიან იმაზე, რომ ენმ დაემსგავსოს რესპუბლიკურ პარტიას, რომელიც ვეღარასდროს საკუთარი ძალებით ვერც ერთ არჩევნებზე ბარიერსაც კი ვერ გადალახავს სხვებთან კოალიციაში შესვლის და გაერთიანების გარეშე (ეს სხვები კიდევ ვინ არიან ჩვენი ქვეყნის პოლიტიკურ სპექტრში ყველამ კარგად ვიცით).

ჩემთვის პირადად გიგას, გიგის, დათო დარჩიაშვილის, ზურა ჭიაბერაშვილის, სერგო რატიანის, ნიკა რურუას და კიდევ გარკვეული ადამიანების ღირებულებები ვინც ამ პარტიაში არიან, არა თუ მისაღებია, არამედ ათი ხელი რომ მქონდეს, ათივე ხელს ავწევდი იმ იდეების გასატარებლად და მხარდასაჭერად რაც მათ აქვთ. მაგრამ არის ერთი მაგრამ…მე ვერ გავიზიარებ იმ მოსაზრებას, რომ თურმე სააკაშვილი უნდა ჩამოშორდეს პარტიას (თავისივე შექმნილ პარტიას) და თურმე დავით ბაქრაძემ, ან თუნდაც გიგამ, ან გიგიმ ან ვინმე სხვამ უნდა ჩაანაცვლოს ის.

ბევრისგან განსხვავებით ბელადომანიით არასდროს ვყოფილვარ დაავადებული და საკუთარი თავის ბელადიც თავად ვიყავი ყოველთვის (აქაც სხვებისგან განსხვავებით), მაგრამ თუ ეს ჩემთვის მეტად პატივსაცემი ადამიანები თვლიან, რომ დღეს ისინი იმდენად ძლიერი პოლიტიკოსები არიან, რომ შეუძლიათ პარტია არა თუ მიშას გარეშე მართონ, გაამარჯვებინონ კიდეც 2020 წლის არჩევნებზე, მაშინ რა უშლით ხელს იმაში, რომ შექმნან ახალი, დასავლური ღირებულებების კარგი პარტია და მოემზადოან ამ თავიანთი ძალებით 2020 წლის არჩევნებში ბიძინას დასამარცხებლად? შეეშვით ამ მიშას და მის შექმნილ პარტიას, იყოს ის ცალკე და აკეთოს ის რადაც თვლის საჭიროდ.

თუ მიშამ შეძლო 2001 წელს და შეექმნა ახალი პარტია (არც თუ ისე დიდი პოლიტიკური გამოცდილების მქონემ) და ეს პარტია 2003 წელს უკვე ხელისუფლების სათავეში მოვიდა, თქვენ რა გაგიხდათ და რა გიშლით ხელს შექმნათ ერთი პარტია 2016 წელს და მოემზადოთ 2020 წლის არჩევნებისთვის? ჩემივე აშენებული სახლიდან ჩემ გაგდებას რომ ცდილობთ, ეგ სადაური წესია? ამას ვერანაირი პარტიის დემოკრატიული წესების საფარველით ვერ შენიღბავთ, არ ინიღბება და არც შეინიღბება. გამოჩნდა ეს არჩევნების მეორე ტურზე კარგად.

ამიტომ, ჩემი კეთილი რჩევა იქნება ჩემო მეგობრებო, იზრუნეთ და იფიქრეთ იმაზე რაც ზემოთ უკვე დაგიწერეთ. მიშა როცა შევარდნაძეს აღარ ეთანხმებოდა, კი არ ამდგარა და პარტიის ასახევად მუშაობა კი არ დაუწყია, ადგა, წამოვიდა და შექმნა ახალი პარტია. რაც იყო სწორი, როგორც პოლიტიკურად, ასევე მორალურად.

თქვენ დღეს გაქვთ საკმაოდ დიდი პოლიტიკური გამოცდილება დაგროვილი (მიშას იმ დროს მაგდენიც არ ჰქონდა). ამდენი დეგენერატების პარტიების არსებობას ქვეყანაში, არ ჯობია არსებობდეს თუნდაც ორი სწორი ღირებულებების ღანსაღი პარტია? ჯობია. ხომ თვლიან ვიღაცეები რომ მიშას გამო ენმ-მა ხმები დაკარგა? ხომ თვლიან ვიღაცეები, რომ ადამაიანებში არსებობს შიში მიშას მიმართ და ა.შ. და თუ ეს შიშის გრძნობა მოიხსნება, ისინი მხარს დაგიჭერენ?

ახლა მეორე მხრიდან შეხედეთ: შესაძლოა ეგრეც იყოს, მაგრამ იმაზე დაფიქრდით, რამდენჯერ მეტ ამომრჩეველს დაკარგავს მიშას ჩამოშორებით ენმ? ძალიან, ძალიან ბევრს. ამიტომ მოდით ნურც ენმ-ის ამომრჩეველს ნუ დავკარგავთ და ის ამომრჩეველიც, რომელზე გათვლის გაკეთებასაც ფიქრობთ, მოიზიდეთ იმ პარტიაში სადაც მიშა არ გეყოლებათ და სადაც წინასაარჩევნო დაპირებებს თქვენ გასცემთ”,- წერს სოციალურ ქსელში თეა თუთბერიძე.

შეგახსენებთ, რომ გიგი უგულავამ განცხადება გაავრცელა, სადაც პარტიაში განსახორციელებელ ცვლილებებზე ისაუბრა.

უგულავას თქმით, პარტიის მხარდამჭერთა ნაწილს მიაჩნია, რომ მიხეილ სააკაშვილი კვლავ უპირობოდ იმსახურებს პარტიის თავმჯდომარეობას, მაგრამ მოცემულ რეალობაში ეს, სამწუხაროდ, შეუძლებელია.

“აქედან აბსოლუტურად არასწორი დასკვნა არ უნდა გამოვიტანოთ, რომ პარტიამ აღარასდროს აირჩიოს თავმჯდომარე. ეს არასწორი და დამაზიანებელია პარტიისთვის. ნურავინ ჩათვლის ამას ღალატად, პირიქით საერთო საქმის ღალატია ერთ წერტილში გაყინული ყოფნა.

არ ვიცი რას ფიქრობს ამ საკითხზე მიშა, მაგრამ ვფიქრობ, რომ ის ამ ჩემს იდეას სრულად გაიზიარებს. მეტიც, მე პარტიის თბილისის ორგანიზაციის თავმჯდომარის თანამდებობიდან ვაპირებ გადავდგე, რათა მივცე შესაძლებლობა – თბილისის აქტივმა ახალი თავმჯდომარე აირჩიოს და მოემზადოს ადგილობრივი არჩევნებისთვის. ერთი სიტყვით, პარტიის ყველა საკვანძო, არჩევით თანამდებობაზე უმდა ჩატარდეს არჩევნები”,- აღნიშნულია გიგი უგულავას განცხადებაში.

banner
წინა სტატიაშიგია ვოლსკი : კარასინის ბოლო განცხადება არ ქმნის საფუძველს, რომ რაიმე სახის მოლაპარაკებები დაიწყოს
შემდეგი სტატიალადო სადღობელაშვილი: უგულავას შეიწყალებენ, წერილი იმის ნიშანია, რომ “ოცნებას” გაურიგდა