მიხეილ სააკაშვილი: შეკრება და არდაშლა, სანამ არ დაინიშნება რიგგარეშე არჩევნები!

საქართველოს მესამე პრეზიდენტი არჩევნებთან დაკავშირებით პრემიერმინისტრის დღევანდელ განცხადებებს ეხმაურება.

როგორც მიხეილ სააკაშვილის განცხადებაშია აღნიშნული, რაც უფრო ხშირად გაიმეორებს ირაკლი ღარიბაშვილი, რომ ქვეყანაში რიგგარეშე არჩევნები “არ იქნება”, ეს არჩევნები მით უფრო სწრაფად ჩატარდება.

მესამე პრეზიდენტი ასევე წერს, რომ შექმნილი კრიზისიდან ერთადერთი გამოსავალი ხალხის გაერთიანებაა:

“ივანიშვილის პრემიერის დღევანდელი ცინიზმი მხოლოდ ერთ რამეზე მეტყველებს – მათ მთლიანად აქვთ დაკარგული რეალობის გრძნობა და მათგან მხოლოდ ცუდს უნდა ველოდოთ. რაც უფრო ხშირად გაიმეორებენ ივანიშვილის “რაც გინდა ის უწოდეები”, რომ ქვეყანაში არჩევნები არ იქნება, მით უფრო სწრაფად ჩატარდება რიგგარეშე არჩევნები. ქართველმა ხალხმა უკვე ბოლო სამ არჩევნებზე გასცა რეჟიმს პასუხი და ვინაიდან არჩევნები, როგორც ინსტიტუტი გაუქმებულია, ამჯერად უპასუხებს ძალიან მძლავრი, სამოქალაქო პროტესტით ქუჩაში – 14 ოქტომბერი ამის მხოლოდ პირველი მერცხალი იყო.

ხალხის გატაცებასა და ძარცვას ბოლო მოეღება და საქართველო ისევ დაუბრუნდება სწრაფ განვითარებას. ქართველები შეძლებენ თავიანთ ქვეყანაში ღირსეულ, მაღალანაზღაურებად დასაქმებას. ბოლო მოეღება უსამართლობას და არავის არასდროს დაისვამენ თავზე. ამ უმძიმესი კრიზისიდან, რომელიც ქვეყანაში მძვინვარებს, ერთადერთი სწორი გამოსავალია საზოგადოების გაერთიანება და რიგგარეშე არჩევნების, რაც შეიძლება სწრაფი დანიშვნა.

ვეთანხმები “ნაციონალური მოძრაობის” მიერ რეგიონებში გასვლას და ასევე, საერთო ეროვნული მობილიზაციის დღის გამოცხადებას, რომლის მთავარი მიზანი იქნება შეკრება და არდაშლა, სანამ არ დაინიშნება რიგგარეშე არჩევნები და მე არ შემეძლება უკანონო ტყვეობიდან გარეთ გასვლა.

საარჩევნო კამპანიაში ჩემი მონაწილეობის და ხალხის მობილიზების პირობებში (რასაც ჩვენ ვგეგმავთ) საქართველოს საზოგადოება დიდი უპირატესობით მოიგებს რიგგარეშე არჩევნებს. დღევანდელი დღის შემდეგ მთელ საქართველოს უნდა გავაგებინოთ, რომ გვაქვს კონკრეტული გეგმა და აუცილებლად ბოლომდე მივიყვანთ დაწყებულ საქმეს”, – წერს მიხეილ სააკაშვილი.

banner
წინა სტატიაშიალასანია სააკაშვილზე: ჯანმრთელობასთან დაკავშირებული პრობლემები გაუარესებულია
შემდეგი სტატიააშშ-ის სახელმწიფო მდივანი: უკვე ათწლეულზე მეტია, რუსეთი აგრესიულ ქმედებებს განმეორებით ჩადის: საქართველოში, მოლდოვაში და 2014 წელს უკრაინაში