გერმანიის კანცლერი ანგელა მერკელი თვლის, რომ დასავლეთ ბალკანეთის ექვსი სახელწმიფო “”გეოპოლიტიკური მიზეზებით
სამომავლოდ ევროკავშირის წევრები გახდებიან. “ამ პროცესის სტიმულირება ევროკავშირის მთავარ ინტერესებს პასუხობს” – მერკელმა 5 ივლისს დასავლეთ ბალკანეთისადმი მიძღვნილ კონფერენციაზე განაცხადა, რომელიც გერმანიაში ონლაინ ჩატარდა.
სავარაუდოდ, ამ სიტყვებით მერკელმა რეგიონში ჩინეთისა და რუსეთის გავლენების გაძლიერებაზე მიუთითა – Reuters-ი წერს. რეგიონალური თანამშრომლობის გაძლიერებამ, რომელიც 2014 წლიდან მიმდინარეობს ე.წ. “ბერლინის პროცესის” ფარგლებში, უკვე გამოიღო პირველი შედეგები, მაგალითად, დასავლეთ ბალკანეთის ქვეყნებში როუმინგის სისტემის გაუქმება, რომელიც ევროკომისიის მხარდაჭერით მომზადდა და 2021 წლის 1 ივლისს შევიდა ძალაში – “დოიჩე ველე” წერს.
კონფერენციაში მონაწილეობას იღებდნენ სერბეთი, ალბანეთი, ჩრდილოეთ მაკედონიის რესპუბლიკა, ბოსნია და ჰერცოგოვინა, ჩერნოგორია და კოსოვო. კონფერენციას ევროკომისიის თავმჯდომარე ურსულა ფონ დერ ლეიენიც ესწრებოდა.