თბილისში, მეიდანზე მდებარე რესტორან „მაჭახელაში“ გაჩენილი ხანძრის ჩაქრობა, გვიან ღამით მოხერხდა. ადგილზე 60-მდე მეხანძრე-მაშველი მუშაობდა.
წინასწარი ინფორმაციით, ხანძარი შენობის სახურავს გაუჩნდა, სადაც საწყობი იყო განთავსებული, თუმცა მიზეზი უცნობია.
რესტორნის დირექტორის მტკიცებით, შენობაში უსაფრთხოების ნორმები დაცული იყო. ერთ-ერთი ვერსიით, ხანძრის გამომწვევი მიზეზი გამწოვი მილი გახდა.
უსაფრთხოების მიზნით, მიმდებარე ტერიტორიაზე დროებით გაითიშა ელექტროენერგია და ბუნებრივი აირი. ინციდენტის შედეგად არავინ დაშავებულა.