Middle East Eye-სთან საუბარში არაბმა მაღალჩინოსნებმა თქვეს, რომ ირანმა შესაძლოა ბაქო-თბილისი-ჯეიჰანის (BTC) მილსადენს დაარტყას.
ნავთობსადენის საბოლოო დანიშნულება თურქეთში მდებარე ქალაქი ჯეიჰანია, თუმცა აქედან ნედლი ნავთობის ნაწილი ისრაელს გემებით მიეწოდება.
აქამდე, 2 მარტს ირანის ისლამური რევოლუციის გუშაგთა კორპუსის მეთაურის მრჩეველმა თქვა, რომ დაარტყამდნენ მტრის ნავთობით მომარაგების ხაზებს. MEE-ს წყარომ კომენტარი სწორედ ამ მუქარასთან დაკავშირებით გააკეთა.
“ირანის მუქარა, დაარტყას “მტრის ნავთობის ხაზებს” მხოლოდ BTC-ის თუ შეიძლება მოიაზრებდეს, რადგან ის ისრაელისთვის ნედლი ნავთობის მთავარი მიმწოდებელია”. – თქვა წყარომ MEE-სთან საუბარში.
როგორც MEE წერს, ისრაელი BTC-ის მეშვეობით ნავთობის იმპორტის დაახლოებით 30%-ს იღებს.
MEE-ს წყარომ აღნიშნა, რომ ნავთობსადენი აზერბაიჯანის, საქართველოსა და თურქეთის ტერიტორიაზე გადის და თავდასხმის მცდელობის შემთხვევაში ირანმა შეიძლება ყველაზე მარტივად მისაწვდომ აზერბაიჯანის ტერიტორიას დაარტყას.
მუქარიდან ორი დღის შემდეგ ცნობები, ბაქო-თბილისი-ჯეიჰანზე თავდასხმის შესახებ, არ გავრცელებულა. თუმცა, 4 მარტს NATO-ს საჰაერო თავდაცვის შესაძლებლობებმა თურქეთის საჰაერო სივრცისკენ მიმავალი ირანული რაკეტა ჩამოაგდო. უცნობია, რა იყო რაკეტის სამიზნე და საბოლოო დანიშნულება.
